រញ្ជួយដីកម្រិត ៦.៣ រ៉ិចទ័រ បានវាយប្រហារនៅជិតទីក្រុង Mazar-i-Sharif នៅភាគខាងជើងប្រទេសអាហ្វហ្គានីស្ថាន កាលពីយប់មិញ បណ្តាលឲ្យមនុស្សយ៉ាងហោចណាស់២០នាក់ស្លាប់ និង៣២០ នាក់រងរបួស តាមការបញ្ជាក់ពីក្រសួងសុខាភិបាលសាធារណៈរបស់រដ្ឋាភិបាលតាលីបង់។
ប្រភពពីសារព័ត៌មានAl Jazeera នៅថ្ងៃទី៣ខែវិច្ឆិកា។
ការរញ្ជួយដីនេះបានកើតឡើងនៅម៉ោង ១២:៥៩ ព្រឹកថ្ងៃចន្ទ (២០:២៩ GMT) នៅជម្រៅប្រហែល ២៨ គីឡូម៉ែត្រ តាមការស្ទង់របស់ ទីភ្នាក់ងារភូមិសាស្ត្រសហរដ្ឋអាមេរិក (USGS)។
អ្នកនាំពាក្យក្រសួងសុខាភិបាល លោក Sharafat Zaman បានបញ្ជាក់ថា ចំនួនអ្នកស្លាប់ដែលបានរាយការណ៍បឋមអាចនឹងកើនឡើង ព្រោះក្រុមសង្គ្រោះកំពុងបន្តស្វែងរកជនរងគ្រោះនៅតំបន់ជនបទជាច្រើន។
រញ្ជួយដីនេះកើតឡើងតែប៉ុន្មានខែក្រោយពីគ្រោះមហន្តរាយដ៏ធំមួយនៅភាគខាងកើតប្រទេស ដែលបានសម្លាប់មនុស្សជាង ២,២០០ នាក់។ វាបានបន្ថែមសម្ពាធដល់រដ្ឋាភិបាលតាលីបង់ ដែលកំពុងប្រឈមមុខនឹងការខ្វះជំនួយបរទេស និងបញ្ហាសង្គមសេដ្ឋកិច្ចធ្ងន់ធ្ងរ។
ទីភ្នាក់ងារគ្រប់គ្រងគ្រោះមហន្តរាយជាតិបានប្រកាសថា ការវាយតម្លៃស្ដីពីការខូចខាត និងចំនួនអ្នកស្លាប់ជាក់លាក់នឹងត្រូវចេញផ្សាយនៅពេលក្រោយ បន្ទាប់ពីក្រុមជួយសង្គ្រោះធ្វើការស្ទង់មតិពេញលេញ៕