(កណ្ដាល)៖ លោក ផន ប៊ន អនុភូមិរទាំងនិងជាអ្នកគួកជេរដី បានបញ្ជាក់យ៉ាងច្បាស់ថា”ផ្ទៃដីបឹងរទាំង”មួយផ្នែកខាងកើតទំហំជិត៧ហិកតា ស្ថិតក្នុងភូមិរទាំងត្បូង ឃុំភូមិធំ ស្រុកកៀនស្វាយ ខេត្តកណ្ដាល ត្រូវបានលក់ឱ្យក្លាយជាកម្មសិទ្ធិឯកជនប្រាកដមែន!។
ក្រោមការចាត់ចែងរៀបចំពីមន្ត្រីជំនាញភូមិបាលស្រុក.ដោយយកពលរដ្ឋមកធ្វើជាខែល(អាស្រ័យផល)ក្នុងការឈរឈ្មោះលក់តម្លៃ១៨ដុល្លារ ក្នុង១ម៉ែត្រការ៉េ..!!។
បើតាមលោក ផន ប៊ន
“ផ្ទៃដីបឹង”ត្រង់ចំណុចខាងលើ ត្រូវបានឧកញ៉ាម្នាក់ ចាប់ផ្ដើមប្រមូលទិញដំបូង កាលពីអំឡុងឆ្នាំ២០២១ និងបន្តបន្ទាប់ទៀត..!។
ប៉ុន្តែរហូតដល់សព្វថ្ងៃ មិនទាន់ប្រគល់លុយឱ្យពលរដ្ឋគ្រប់ចំនួននោះទេ ជាក់ស្តែង ទើបនិងប្រគល់ឱ្យពលរដ្ឋប្រមាណជា២០ទៅ៣០%ប៉ុណ្ណោះ នៃតម្លៃដីសរុប! បើទោះបីជាពលរដ្ឋ សួរនាំរឿងលុយបង្គ្រប់ក៏ដោយ។
ខណៈក្រុមហ៊ុនឧកញ៉ា លើកឡើងថា ចាំ(ប្លង់រឹង)ចេញសិន នឹងប្រគល់លុយឱ្យគ្រប់ចំនួន បច្ចុប្បន្នដីនេះ បានបិទប្រកាសរួចហើយ និងមានបង្កាន់ដៃ!។
លោក ផន ប៊ន អះអាងថា រាល់ការទិញលក់”ដីបឹងរទាំង”១ផ្នែកទំហំជិត៧ហិកតានេះ គឺមានការឯកភាពត្រូវគ្នាជាប្រព័ន្ធតាំងពីរដ្ឋបាលឃុំ.ស្រុក.ជំនាន់លោក អ៊ូ ឈាង.ជាអភិបាលស្រុក ដោយមានការចាត់ចែងរៀបចំឯកសារពីមន្ត្រីភូមិបាលស្រុក.ទៀតផង.ហើយពលរដ្ឋដែលបានឈរឈ្មោះលក់ដីបឹង គឺជិត១០០គ្រួសារ ដែលមានកន្ទុយដីជាប់និងបឹងតែម្ដង.!។
*ជាមួយគ្នានេះពលរដ្ឋបានប្រាប់”ដើមរាំង”នៅថ្ងៃទី០៤.១១.២០២៥ថា”ផ្ទៃដីបឹងរទាំង”គឺរាងទ្រវែងលាតសន្ធឹង បណ្ដោយពីលិចទៅកើត ក្នុងភូមិរទាំងត្បូង ឃុំភូមិធំ ស្រុកកៀនស្វាយ ត្រូវគេឃុបឃិតគ្នា យកលក់ឱ្យឈ្មួញ អស់១ផ្នែកខាងកើតដោយស្ងាត់ៗ!។
ជាក់ស្តែង មួយរយៈចុងក្រោយនេះ ស្រាប់តែលេចមុខលោក ផន ប៊ន អនុភូមិរទាំងនិងបក្ខពួក ក្រោមការរៀបចំពីអភិបាលរងស្រុកម្នាក់ បានមកបន្តកក់លុយឱ្យពលរដ្ឋ
ដែលជាអ្នកឈរឈ្មោះលក់ដីបឹង ដើម្បីចាត់ចែងបំពេញនីតិវិធី ក្នុងការវាស់វែងជាប្រព័ន្ធ.ដោយមានក្បាលដី(៧៩៩)!!។
ម្ល៉ោះហើយ ទើបមន្ត្រីជំនាញធ្វើការវិនិច្ឆ័យនិងអង្កន់”ផ្ទៃដីបឹងរទាំង”ជា៤ទៅ៥កំណាត់!!។
ក្នុងនោះ ផ្នែកខ្លះរក្សាទុកជាដីបឹងដដែល.ខ្លះឆ្វៀលទុកធ្វើផ្លូវ.ខ្លះទុកជាផ្លូវទឹក.ខ្លះក្លាយជាកម្មសិទ្ធឯកជន..!។
ជាក់ស្តែង៖
ផ្ទៃដីបឹងរទាំង ដែលមានក្បាលដីលេខ(១២៦៦)(១៧៧៣)(១៧៣៥)(៧៩៩)និង(១៨០១) គឺជាដីបឹងសាធារណៈរបស់រដ្ឋសុទ្ធសាធ!!។
ពលរដ្ឋបន្តថា យុទ្ធសាស្ត្ររបស់ក្រុមលោក ផន ប៊ន គឺតម្រូវឱ្យពលរដ្ឋដែលមានកន្ទុយដីជាប់បឹង ជាអ្នកឈរឈ្មោះលក់ផ្ទាល់ ជ្រកក្រោមលេសថា”អាស្រ័យផល”ដោយមិនយកពលរដ្ឋពីឆ្ងាយមកទេ ព្រោះខ្លាចបែកការណ៍ និងកើតរឿងប្ដឹងផ្ដល់..!។
ខណៈដែលពលរដ្ឋខ្លះ មិនទាំងដឹងថា ដីដែលខ្លួនផ្ដិតមេដៃលក់នោះ មានប្រវែងប៉ុន្មានម៉ែត្រ ហើយមានទំហំប៉ុណ្ណានោះទេ.!។
ជាក់ស្តែង អ្នកខ្លះលក់៥ឆ្នាំហើយ មិនដឹងលុយនៅឯណា? ហើយក៏មិនដឹងថា បានលុយប៉ុន្មានដែរ..?។
ស្របពេលដែលពលរដ្ឋ អ្នកឈរឈ្មោះលក់ មិនហ៊ានតវ៉ាទាមទារអ្វីតឹងតែងឡើយ ព្រោះជាដីបឹង មិនមែនជាដីរបស់ខ្លួន.ហើយការលក់នេះ គឺតាមការរៀបចំរបស់អាជ្ញាធរប៉ុណ្ណោះ!!។
*ជុំវិញរឿងនេះលោក ឡាង ថុល
មេភូមិរទាំងត្បូង បានថ្លែងប្រាប់”ដើមរាំង”ថា ពិតជាមានការលក់ដីបឹង ប្រាកដមែន!!។
*ក្នុងនោះដែរនៅថ្ងៃទី០៤.១១.២០២៥”ដើមរាំង”បានព្យាយាមសុំការបំភ្លឺពីលោក មាន ណាត មេឃុំភូមិធំ
ប៉ុន្តែទូរស័ព្ទចូលហើយ លោកចុចបិទ!!។
*រីឯលោក អ៊ូ ឈាង
អតីតអភិបាលស្រុក.បច្ចុប្បន្នជាប្រធានក្រុមប្រឹក្សាស្រុកកៀនស្វាយ បានថ្លែងទទួលស្គាល់ថា ផ្ទៃដីបឹងត្រង់ចំណុចខាងលើ គឺមានការទិញលក់ប្រាកដមែន។
ប៉ុន្តែបច្ចុប្បន្ន លោកបានចូលនិវត្តន៍ហើយ រូបលោកក៏មិនដឹងថា ដីទាំងនោះគេចាត់ចែងទៅខាងណាដែរ..?។
*ចំណែកលោក ឡូវ សុខសាន
អភិបាលស្រុកកៀនស្វាយ ទូរស័ព្ទចូលហើយ លោកមិនទទួល!!។
*ចំពោះលោក កេត ផល
ប្រធានការិយាល័យរៀបចំដែនដី នគរូបនីយកម្មសំណង់ និងភូមិបាលស្រុកកៀនស្វាយ បានថ្លែងថា រាល់ការទិញលក់ដីបឹងជារឿងរបស់ពលរដ្ឋ កុំបន្ទោសជំនាញ!។
-ចំពោះសំណួរថា តើក្បាលដីលេខ(១៨០១)ឮថាជាកម្មសិទ្ធិឯកជននោះម៉េចវិញ..??។
-ត្រង់ចំណុចនេះលោក កេត ផល បានឆ្លើយថា យើងកាត់ឆ្វៀលដីចុះបញ្ជី គឺមើលតាមស្ថានភាពជាក់ស្ដែង!។
ក្នុងនោះ ប្រសិនបើយកទៅតាមអនុក្រឹត្យនៃផ្ទៃបឹងវិញ គឺអស់ដីពលរដ្ឋហើយ!!។
*លោក ប្រាក់ ឡាក់
ប្រធានមន្ទីរធនធានទឹក និងឧតុនិយម ខេត្តកណ្ដាល ទូរស័ព្ទចូលហើយ លោកមិនទទួល!។
*ក្នុងនោះលោក សុក កាន់ណារិទ្ធ
ប្រធានមន្ទីររៀបចំដែនដី នគរូបនីយកម្មសំណង់ និងសុរិយោដី ខេត្តកណ្ដាល បានថ្លែងថា ខ្ញុំរវល់នៅសាំងហ្គាពួរ មិនអាចបកស្រាយបានទេ រួចក៏ចុចបិទទូរស័ព្ទ.!។
*ដោយឡែក អ្នកនាំពាក្យសាលាខេត្តកណ្ដាល ទាំងលោក ជី ស៊ីវុត្ថា
នាយករដ្ឋបាល រួមនិងលោក ឌឹម បូរ៉ា
អភិបាលរងខេត្ត គឺទូរស័ព្ទខលមិនចូលឡើយ!។
*តាមរយៈសារព័ត៌មាន”ដើមរាំង”ពលរដ្ឋសុំស្នើយ៉ាងទទូចដល់ ឯកឧត្តម គួច ចំរើន
អភិបាលខេត្តកណ្ដាល ឯកឧត្តមកិត្តិនីតិកោសលបណ្ឌិត ឱម យ៉ិនទៀង
ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ ឯកឧត្ដមអភិសន្តិបណ្ឌិត ស សុខា
ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ឯកឧត្តម សាយ សំអាល់
ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ ជាពិសេសសម្ដេចធិបតី ហ៊ុន ម៉ាណែត
នាយករដ្ឋមន្ត្រីនៃកម្ពុជា មេត្តាបើកការស្រាវជ្រាវ វែកមុខអ្នកពាក់ព័ន្ធក្នុងការរៀបចំលក់ដីបឹង និងកាត់ឆ្វៀលដីបឹងឱ្យក្លាយជាកម្មសិទ្ធិឯកជន យកមកផ្ដន្ទាទោសតាមច្បាប់! ដើម្បីអភិរក្សធនធានធម្មជាតិផ្ទៃដីបឹងរទាំង ទុកជាសម្បត្តិរដ្ឋដដែល សម្រាប់ពួកគាត់អាស្រ័យផលនេសាទ តកូនតចៅ៕
