ប្រទេសអារ៉ាប៊ីសាអូឌីត បានឈានដល់ជំហានដ៏សំខាន់មួយក្នុងសំណើទិញយន្តហោះចម្បាំង F-35 Lightning II ចំនួន 48 គ្រឿង ពីសហរដ្ឋអាមេរិក។
ប្រភពពីសារព័ត៌មានReuters នៅថ្ងៃទី៥ខែវិច្ឆិកា។
ការវាយតម្លៃនេះបានបើកផ្លូវឲ្យរដ្ឋបាល ប្រធានាធិបតី Donald Trump អាចពិចារណាអំពីការអនុញ្ញាតឲ្យអារ៉ាប៊ីសាអូឌីតទិញយន្តហោះចម្បាំងទំនើបជាងគេនៅពេលបច្ចុប្បន្ន ដែលអាចមានតម្លៃសរុបរាប់ពាន់លានដុល្លារ។
ប្រសិនបើកិច្ចព្រមព្រៀងត្រូវបានអនុម័ត វានឹងក្លាយជាការផ្លាស់ប្តូរគោលនយោបាយយោធាដ៏សំខាន់មួយរបស់អាមេរិក និងអាចបង្កការផ្លាស់ប្តូរតុល្យភាពអំណាចយោធានៅតំបន់មជ្ឈិមបូព៌ា។
យន្តហោះ F-35 Lightning II ដែលផលិតដោយក្រុមហ៊ុន Lockheed Martin ត្រូវបានគេចាត់ទុកថាជា យន្តហោះចម្បាំងសម្ងាត់ (Stealth Fighter) មានសមត្ថភាពប្រយុទ្ធខ្ពស់ និងបច្ចេកវិទ្យាទំនើបបំផុត។ ប្រទេសជាច្រើនដូចជា សហរដ្ឋអាមេរិក កូរ៉េខាងត្បូង និងអ៊ីស្រាអែល ក៏កំពុងប្រើប្រាស់វាដែរ។
សំណើរទិញនេះត្រូវបានរៀបចំឲ្យស្របតាមពេលនៃដំណើរទស្សនកិច្ចជាផ្លូវការរបស់ ព្រះអង្គម្ចាស់ Mohammed bin Salman ទៅកាន់សហរដ្ឋអាមេរិក។ ប្រភពមួយបានបញ្ជាក់ថា ការពិភាក្សានេះកំពុងដំណើរការយ៉ាងប្រុងប្រយ័ត្ន ដោយសារតែការព្រួយបារម្ភអំពីសន្តិសុខតំបន់ និងទំនាក់ទំនងស្មុគស្មាញជាមួយប្រទេស អ៊ីស្រាអែល ដែលជាដៃគូសន្តិសុខសំខាន់របស់អាមេរិក៕