ស្ថានការណ៍តានតឹងតាមព្រំដែនរវាងអាហ្វហ្គានីស្ថាន និងប៉ាគីស្ថាន បានកើនឡើងម្តងទៀតកាលពីថ្ងៃព្រហស្បតិ៍ថ្ងៃទី6 ខែវិច្ឆិកា ឆ្នាំ 2025 បន្ទាប់ពីទាហានភាគីទាំងពីរបានបាញ់ប្រហារគ្នា នៅពេលដែលគណៈប្រតិភូមកពីប្រទេសទាំងពីរនៅក្នុងទីក្រុងអ៊ីស្តង់ប៊ុល កំពុងចូលរួមក្នុងការចរចាដើម្បីព្យាយាមរកដំណោះស្រាយសន្តិភាព និងធានាបទឈប់បាញ់ថ្មី។
ប្រភពពីសារព័ត៌មានAl Jazeera។
កិច្ចចរចានៅទីក្រុងអ៊ីស្តង់ប៊ុលមានគោលបំណងបន្តពីការព្រមព្រៀងឈប់បាញ់ដែលបានសម្រេចនៅប្រទេសកាតាកាលពីថ្ងៃទី 19 ខែតុលា បន្ទាប់ពីការប៉ះទង្គិចដ៏ឈ្លានពានមួយសប្តាហ៍រវាងប្រទេសជិតខាងទាំងពីរ ដែលបានសម្លាប់មនុស្សរាប់សិបនាក់ រួមទាំងទាហាន និងជនស៊ីវិល ហើយបានបង្កឱ្យមានអ្នករបួសរាប់រយនាក់។
មូលហេតុនៃជម្លោះសន្តិសុខនៅតែជាចំណុចកណ្តាលនៃភាពតានតឹង។ រដ្ឋាភិបាលប៉ាគីស្ថានចោទប្រកាន់អាហ្វហ្គានីស្ថានថា បានផ្តល់ជម្រកដល់ក្រុមភេរវកម្ម តាលីបង់ប៉ាគីស្ថាន (TTP) ដែលត្រូវបានចោទប្រកាន់ថាបានប្រព្រឹត្តការវាយប្រហារជាច្រើននៅក្នុងប្រទេសប៉ាគីស្ថាន។ ប៉ុន្តែរដ្ឋាភិបាលតាលីបង់នៅកាប៊ុលបានបដិសេធការចោទប្រកាន់ទាំងនេះ។
ក្នុងសេចក្តីថ្លែងការណ៍មួយ លោក Zabihullah Mujahid អ្នកនាំពាក្យរដ្ឋាភិបាលអាហ្វហ្គានីស្ថាន បាននិយាយថា កងកម្លាំងប៉ាគីស្ថានបានបើកការបាញ់ប្រហារឡើងវិញលើទីក្រុង Spin Boldak នៅខេត្ត Kandahar នៅរសៀលថ្ងៃព្រហស្បតិ៍ ខណៈដែលកិច្ចចរចាកំពុងបន្តនៅអ៊ីស្តង់ប៊ុល។
ប៉ាគីស្ថានវិញបានបដិសេធការចោទប្រកាន់នេះ ហើយបានចោទប្រកាន់ថា ការបាញ់ប្រហារត្រូវបានផ្តួចផ្តើមពីភាគីអាហ្វហ្គានីស្ថានជាមុន។
សហរដ្ឋអាមេរិក និងប្រទេសទួគីយេកំពុងធ្វើសមាហរណកម្មការចរចារនេះ ដើម្បីរកវិធីស្តារភាពស្ងប់ស្ងាត់តាមព្រំដែន និងបញ្ចប់វដ្តអំពើហិង្សាដែលបានបន្តអស់ជាច្រើនខែ៕