(ព្រៃវែង)៖ មានការអះអាងថា មន្ត្រីនគរបាលច្រកទ្វារព្រំដែនអន្តរជាតិកោះរកា ស្រុកពាមជរ ខេត្តព្រៃវែង បានកំណត់យកលុយពីក្រុម”រថយន្តយីឌុប”ដឹកអង្ករ ទៅលក់ឱ្យឈ្មួញវៀតណាម តាមច្រកទ្វារព្រំដែនមួយនេះ ក្នុង១ជើងៗ ចំនួន៤០០.០០០៛(សែសិបម៉ឺនរៀល)ជាកំហិត!។
ជាថ្នូរ នឹងអនុញ្ញាតឱ្យ”រថយន្តយីឌុប”ទាំងនោះបង្ហូរអង្ករ ចូលក្នុងទូកវៀតណាម ឬលើកដាក់លើរថយន្តវៀតណាម រួចដឹកឆ្លងដែនចេញទៅប្រទេសវៀតណាម រាល់ពេលព្រឹកព្រលឹម ជិតភ្លឺរាប់ខែមកហើយ..!។
*ករណីនេះ
មន្ត្រីព្រំដែនបដិសេធថា គ្មានឡានអង្ករ ចេញតាមផ្លូវលើទេ មានតែចេញតាមផ្លូវទឹក ចំពោះរឿងលុយ មន្ត្រីឆ្លើយដាក់ទៅ(បេន)ជាអ្នកយក..!!។
*ប្រភពច្បាស់ការណ៍បានប្រាប់”ដើមរាំង”ថា ក្នុង១ថ្ងៃៗមាន”រថយន្តយីឌុប”ជិត២០គ្រឿង បានដឹកជញ្ជូនអង្ករ ចេញពីកម្ពុជា ឆ្លងដែនចូលទៅប្រទេសវៀតណាម តាមច្រកទ្វារព្រំដែនអន្តរជាតិកោះរកា។
ក្នុងនោះ ខ្លះបើកចូល(បេន)រួចលក់ឱ្យឈ្មួញវៀតណាម ដោយបង្ហូរចូលទូក ដើម្បីដឹកចេញទៅកាន់ប្រទេសវៀតណាម.!។
ខ្លះបើកចូល(បេន) និងលើកដាក់លើរថយន្តវៀតណាម រួចទើបដឹកជញ្ជូន ទៅកាន់ប្រទេសវៀតណាម តាមច្រកទ្វារព្រំដែនមួយនេះជាហូរហែ..ហើយសកម្មភាពនេះមានរយៈពេលជាង២ខែ មកហើយ!។
ប្រភពដដែលបន្តថា សម្រាប់ការនាំចេញអង្ករ ទៅក្រៅប្រទេសជារឿងល្អទេ ដើម្បីលើកស្ទួយតម្លៃស្រូវក្នុងស្រុក…!។
ប៉ុន្តែអ្វីដែលគួរឱ្យហួសចិត្តខ្លាំងបំផុតនោះ គឺលោក កែវ ជា នាយប៉ុស្តិ៍នគរបាលច្រកទ្វារព្រំដែនអន្តរជាតិកោះរកា បែរជាឆ្លៀតឱកាសកំណត់យកលុយពីរថយន្តដឹកអង្ករ ទាំងផ្លូវទឹកនិងផ្លូវគោក។
ដោយក្នុង១ជើងៗចំនួន១០០ដុល្លារជាកំហិត! ដោយផ្អែកថា លុយទាំងនេះពុំមែនយកមកចាយតែម្នាក់ឯងទេ។
ពោលគឺ មួយចំណែកយកមកទូទាត់បង់ឱ្យការិយាល័យគយ និងសមត្ថកិច្ចពាក់ព័ន្ធនៃច្រកទ្វារព្រំដែន.!។
ប្រភពបញ្ជាក់ថា រាល់ការកំណត់យកលុយពីរថយន្តដឹកអង្ករទាំងនោះ គឺលោក កែវ ជា មិនយកផ្ទាល់ខ្លួនឯងឡើយ!។
ជាក់ស្ដែងលោក កែវ ជា ផ្ដល់អត្ថិភាពឱ្យកូនប្រុសរបស់ខ្លួន ដែលមានតួនាទីជានាយរងប៉ុស្តិ៍នគរបាលច្រកទ្វារព្រំដែនអន្តរជាតិកោះរកា ធ្វើព្យុះធ្វើភ្លៀងក្ដោបសេដ្ឋកិច្ចយ៉ាងពេញបន្ទុក! ដោយរាប់ក្បាលឡានយកលុយ មុនបង្ហូរចូលទូកវៀតណាម និងមុនផ្ទេរលើកដាក់លើ រថយន្តវៀតណាម។
ប្រភពបញ្ជាក់ទៀតថា កូនប្រុសរបស់លោក កែវ ជា មិនត្រឹមតែកំណត់យកលុយពី”រថយន្តយីឌុប”ដឹកអង្ករប៉ុណ្ណោះទេ។
ដោយថែមទាំង កំណត់យកលុយពីរថយន្តដឹកគ្រាប់ឈូក ក្នុង១ជើងៗចំនួន១០០ដុល្លារទៀតផង។
ខណៈក្នុង១ថ្ងៃៗ មានរថយន្តដឹកគ្រាប់ឈូក ចន្លោះពី៥ទៅ៧គ្រឿង ដែលតែងតែ ដឹកចេញទៅវៀតណាម ជាប្រចាំ!។
រីឯរថយន្តដឹកផ្លែស្វាយ ក្នុង១ជើងៗបង់លុយឱ្យកូនប្រុសលោក កែវ ជា ចំនួន១០០ដុល្លារ ទើបអាចបើកទៅលក់ឱ្យឈ្មួញវៀតណាមបាន!។
ប្រភពអះអាងថា ការរាប់ក្បាលឡានកំណត់យកលុយក្នុង១គ្រឿងចំនួន១០០ដុល្លារនេះ មិនពាក់ព័ន្ធនិងការបង់ថ្លៃ(បេន) ឬថ្លៃសោហ៊ុយ កម្មករលើកដាក់លើ រថយន្តវៀតណាមនោះទេ!។
និយាយជារួម លុយ១០០ដុល្លារ ក្នុង១ឡាន ជាការចំណាយដាច់ដោយឡែករបស់អាជីវករ សម្រាប់ប៉ូលីសច្រកទ្វារព្រំដែនកោះរកា យកមករត់ការ ជាថ្នូរនឹងអនុញ្ញាតឱ្យដឹកអង្ករ.ឈូក.ស្វាយ.ឆ្លងដែនចេញទៅប្រទេសវៀតណាម.រាល់ថ្ងៃ…!!។
*ដើម្បីឱ្យមានចម្លើយទាំងសងខាងនៅថ្ងៃទី០៧.១១.២០២៥”ដើមរាំង”បានសុំការបំភ្លឺពីលោក សាង សារ៉ុម ប្រធានស្នាក់ការត្រួតពិនិត្យ ច្រកទ្វារព្រំដែនអន្តរជាតិកោះរកា.ដោយលោកអះអាងថា អង្ករ.៣កំណាត់ គឺពិតជាមានការនាំចេញទៅវៀតណាម តាមទូកប្រាកដមែន តែមិនបាននាំចេញតាមច្រកទ្វារផ្លូវគោកទេ!។
*ចំពោះសំណួរ រឿងយកលុយតើពិតទេ..?។
-ត្រង់ចំណុចនេះលោក សាង សារ៉ុម បញ្ជាក់ថា ខ្លួនមិនយកពីអាជីវករខ្មែរទេ គឺយកពីឈ្មួញវៀតណាម ដែលឱ្យលុយបាយទឹកបន្តិចបន្តួចប៉ុណ្ណោះ..!។
*រីឯលោក ប៊ុន ឡុង ប្រធានការិយាល័យគយនិងរដ្ឋាករ ច្រកទ្វារព្រំដែនអន្តរជាតិកោះរកា
បានថ្លែងថា អង្ករ.គឺចេញទៅវៀតណាមតាមផ្លូវទឹក.។
*ចំពោះសំណួររឿងយកលុយ១ឡាន៤០ម៉ឺនរៀលតើពិតទេ..?។
-លោក ប៊ុន ឡុង បដិសេធថា ខ្ញុំមិនដឹងទេ។
*ចំពោះលោក កែវ ជា នាយប៉ុស្តិ៍នគរបាលច្រកទ្វារព្រំដែនអន្តរជាតិកោះរកាបានថ្លែងរបៀបសើចចំអកនិងជម្រុញឱ្យ”ដើមរាំង”ចុះផ្សាយជុំវិញរឿងរ៉ាវខាងលើ..!។
*ចំពោះសំណួរថា តើកូនរបស់លោកបានយកលុយ១ឡាន ៤០ម៉ឺនរៀលដែរឬទេ..?។
-លោក កែវ ជា បានឆ្លើយថា គ្មានអ្នកណាយកទេ មានតែ(បេន)ជាអ្នកយក.!
លោក កែវ ជា បន្តថា ប្រពន្ធរបស់លោកក៏មាន(បេន)នៅទីនោះដែរ ខណៈ(បេន)ទាំងអស់ចំនួន៧កន្លែង។
ក្នុងនោះលោក កែវ ជា ក៏បានទទួលស្គាល់ដែរថា លុយដែលខ្លួនទទួលយកពីអាជីវករ ជាលុយបាយទឹកមនោសញ្ចេតនា គ្មានការបង្ខិតបង្ខំ ឬគាបសង្កត់ឡើយ!!។
*ទោះជាយ៉ាងណាក៏ដោយ អាជីវករសុំស្នើយ៉ាងទទូចដល់ ឯកឧត្តម សួន សុម៉ាលីន អភិបាលខេត្តព្រៃវែង ឯកឧត្តម បណ្ឌិត គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា ឯកឧត្តមកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មេត្តាចាត់វិធានការលើមន្ត្រីពាក់ព័ន្ធនៅច្រកទ្វារព្រំដែនមួយនេះ កុំឱ្យមានការគាបសង្កត់កំណត់
យកលុយពីរថយន្តដឹក កសិផលខ្មែរយើង ដែលកំពុងនាំចេញទៅក្រៅប្រទេស តទៅទៀត ដើម្បីកុំឱ្យតម្លៃស្រូវធ្លាក់ចុះ និងលើកស្ទួយសេដ្ឋកិច្ចជាតិ បង្កើនជីវភាពកសិករកម្ពុជា៕
