ទីក្រុងអ៊ីស្លាម៉ាបាដ បាននិយាយថា ការចរចានៅទីក្រុងអ៊ីស្តង់ប៊ុល រវាងប៉ាគីស្ថាននិងអាហ្វហ្គានីស្ថានកំពុងស្ថិតក្នុងភាពជាប់គាំង បន្ទាប់ពីភាគីទាំងពីរបានចោទប្រកាន់គ្នាទៅវិញទៅមកអំពីការប៉ះទង្គិចគ្នានៅតាមព្រំដែនដែលជាការរំលោភលើបទឈប់បាញ់ដែលសម្របសម្រួលដោយកាតា។
ប្រភពពីសារព័ត៌មានAANews។
ការអាប់ដេតស្តីពីការចរចាដោយរដ្ឋមន្ត្រីក្រសួងព័ត៌មានប៉ាគីស្ថាន លោក Attaullah Tarar កាលពីថ្ងៃសុក្របានកើតឡើងបន្ទាប់ពីមន្ត្រីអាហ្វហ្គានីស្ថានម្នាក់បាននិយាយថា ជនស៊ីវិលអាហ្វហ្គានីស្ថានបួននាក់ត្រូវបានសម្លាប់ និងប្រាំនាក់ផ្សេងទៀតរងរបួសនៅក្នុងការប៉ះទង្គិចគ្នារវាងកងកម្លាំងប៉ាគីស្ថាន និងអាហ្វហ្គានីស្ថានតាមបណ្តោយព្រំដែនរបស់ពួកគេ ទោះបីជាមានការចរចារួមគ្នាក៏ដោយ។
យ៉ាងណាមិញ មិនមានការអត្ថាធិប្បាយភ្លាមៗពីទីក្រុងកាប៊ុលអំពីការអះអាងរបស់ប៉ាគីស្ថាននោះទេ។
គួរជម្រាបថា ទីក្រុងអ៊ីស្លាម៉ាបាដបានចោទប្រកាន់ទីក្រុងកាប៊ុលថា បានផ្តល់ជម្រកដល់ក្រុមប្រដាប់អាវុធ ជាពិសេសក្រុមតាលីបង់ប៉ាគីស្ថាន (Tehreek-e-Taliban Pakistan ឬ TTP) ដែលតែងតែអះអាងពីការវាយប្រហារដ៏សាហាវនៅក្នុងប្រទេសប៉ាគីស្ថាន។ ទោះជាយ៉ាងណា ក្រុមតាលីបង់អាហ្វហ្គានីស្ថានបដិសេធថាមិនបានផ្តល់ជម្រកដល់ក្រុមនេះទេ៕