យោងតាមប្រភពព័ត៌មានក្នុងស្រុក កងទ័ពអ៊ីស្រាអែលបានចាប់ខ្លួនជនជាតិប៉ាឡេស្ទីនចំនួន ១២ នាក់នៅក្នុងការវាយឆ្មក់យោធានៅទូទាំងតំបន់ West Bank ដែលកាន់កាប់កាលពីថ្ងៃអាទិត្យទី៩ខែវិច្ឆិកា។
ប្រភពពីសារព័ត៌មានAljazeera។
នៅភាគខាងត្បូងនៃតំបន់ West Bank កងកម្លាំងយោធាបានឃុំខ្លួនយុវជនប៉ាឡេស្ទីនចំនួនបីនាក់នៅ Hebron និងពីរនាក់ទៀតនៅ Bethlehem បន្ទាប់ពីវាយឆ្មក់ និងឆែកឆេរផ្ទះរបស់ពួកគេ នេះបើយោងតាមទីភ្នាក់ងារសារព័ត៌មានផ្លូវការ Wafa។
កងទ័ពអ៊ីស្រាអែលក៏បានចាប់ខ្លួនជនជាតិប៉ាឡេស្ទីនចំនួនបីនាក់ទៀតនៅ Ramallah ក្នុងកណ្តាលតំបន់ West Bank ប្រភពព័ត៌មានក្នុងស្រុកបានប្រាប់ Anadolu។
នៅភាគខាងជើង ជនជាតិប៉ាឡេស្ទីនពីរនាក់ទៀតត្រូវបានចាប់ខ្លួននៅក្នុងជំរំជនភៀសខ្លួន Al-Ain ក្នុង Nablus និងពីរនាក់ទៀតនៅភាគខាងកើត Qalqilya បន្ទាប់ពីត្រូវបានទាហានអ៊ីស្រាអែលវាយដំ នេះបើយោងតាមប្រភពព័ត៌មាន។
យោងតាមគណៈកម្មការកិច្ចការអ្នកជាប់ឃុំ និងសមាគមអ្នកទោសប៉ាឡេស្ទីន អ៊ីស្រាអែលបានចាប់ខ្លួនជនជាតិប៉ាឡេស្ទីនជាង ២០.០០០ នាក់ចាប់តាំងពីខែតុលា ឆ្នាំ ២០២៣ ខណៈដែលជាង ៩.១០០ នាក់នៅតែជាប់ឃុំ បន្ថែមពីលើរាប់រយនាក់ដែលត្រូវបានឃុំខ្លួននៅក្នុងជំរំយោធា។
គួរបញ្ជាក់ថា ក្នុងអំឡុងពេលដូចគ្នា ការវាយប្រហារដោយកងទ័ពអ៊ីស្រាអែល និងអ្នកតាំងលំនៅខុសច្បាប់នៅក្នុងតំបន់ West Bank ដែលកាន់កាប់បានសម្លាប់ជនជាតិប៉ាឡេស្ទីនចំនួន ១០៦៩ នាក់ និងរបួសជាង ១០.៣០០ នាក់ផ្សេងទៀត៕