ចំនួនអ្នកស្លាប់ដោយសារព្យុះទីហ្វុងហ្វុង-វុង និងព្យុះទីហ្វុងកាលម៉ាហ្គីនៅប្រទេសហ្វីលីពីន បានកើនដល់២៥៩នាក់ ខណៈដែលមនុស្ស ១១៤នាក់នៅតែបាត់ខ្លួននៅទូទាំងប្រទេស នេះបើយោងតាមប្រព័ន្ធផ្សព្វផ្សាយរបស់រដ្ឋ។
ប្រភពពីសារព័ត៌មានReuters។
កាលពីសប្តាហ៍មុន ព្យុះទីហ្វុងកាលម៉ាហ្គីបានវាយប្រហារខេត្តសេប៊ូ និងតំបន់ជាច្រើននៅក្នុងតំបន់វីសាយ៉ាសកណ្តាល ដោយបណ្តាលឱ្យមនុស្ស ២៣២នាក់ស្លាប់ ១១២នាក់បាត់ខ្លួន និង ៥២៣នាក់រងរបួស ខណៈដែលមនុស្សជាង ៤.១លាននាក់រងផលប៉ះពាល់ នេះបើយោងតាមរបាយការណ៍របស់ទីភ្នាក់ងារសារព័ត៌មានហ្វីលីពីន ដោយដកស្រង់សម្តីក្រុមប្រឹក្សាជាតិកាត់បន្ថយ និងគ្រប់គ្រងហានិភ័យគ្រោះមហន្តរាយ (NDRRMC)។
ព្យុះទីហ្វុងក៏បានបំផ្លាញផ្លូវថ្នល់ និងហេដ្ឋារចនាសម្ព័ន្ធយ៉ាងធ្ងន់ធ្ងរផងដែរ ដោយប៉ះពាល់ដល់ផ្ទះជិត ១៣៥,០០០ខ្នង ដែលក្នុងនោះ ២០,៥១០ខ្នងត្រូវបានបំផ្លាញទាំងស្រុង។
ព្យុះទីហ្វុងហ្វុង-វុងចុងក្រោយបង្អស់ ដែលបានវាយប្រហារប្រទេសនេះនៅយប់ថ្ងៃសុក្រ និងបានចាកចេញពីតំបន់របស់ហ្វីលីពីននៅព្រឹកថ្ងៃអង្គារ បានបណ្តាលឱ្យមនុស្ស ២៧នាក់ស្លាប់ ៣៦នាក់រងរបួស និងពីរនាក់បាត់ខ្លួន។
អាជ្ញាធរមូលដ្ឋានបាននិយាយថា ព្យុះទីហ្វុងនេះបានប៉ះពាល់ដល់មនុស្សជាង ៤,៤ លាននាក់នៅក្នុងតំបន់ចំនួន ១៥ រួមទាំងតំបន់លូហ្សុនកណ្តាល តំបន់ស្វយ័តបាងសាម៉ូរ៉ូនៅមីនដាណាវមូស្លីម (BARMM) និងវីសាយ៉ាសខាងលិច។
ប្រជាជនជាង ៨០០,០០០ នាក់ត្រូវបានជម្លៀសចេញកំពុងជ្រកកោននៅក្នុងមជ្ឈមណ្ឌលជម្លៀសប្រហែល ១១,៨០០ កន្លែងនៅទូទាំងតំបន់ដែលរងផលប៉ះពាល់។
យោងតាមក្រសួងអប់រំ ព្យុះទីហ្វុងថ្មីៗនេះបានបំផ្លាញសាលារៀនជិត ៣,០០០ ដែលក្នុងនោះ ១២៣៨ កន្លែងត្រូវបានបំផ្លាញទាំងស្រុង៕