អ៊ីស្រាអែល បានប្រកាសបើកឡើងវិញនូវ ច្រកឆ្លងកាត់ Zikim ដែលស្ថិតនៅភាគខាងជើងនៃតំបន់ហ្គាហ្សា ដើម្បីអនុញ្ញាតឱ្យមានលំហូរជំនួយមនុស្សធម៌ចូលទៅកាន់តំបន់ដែលកំពុងរងទុក្ខវេទនាខ្លាំង បន្ទាប់ពីការបិទអស់រយៈពេលជិតពីរខែ។
ប្រភពពីសារព័ត៌មានAl Jazeera កាលពីថ្ងៃទី 12 ខែវិច្ឆិកា ឆ្នាំ 2025។
ការបើកឡើងវិញនេះ កើតឡើងបន្ទាប់ពីការអំពាវនាវជាបន្តបន្ទាប់ពីអង្គការសហប្រជាជាតិ និងអង្គការជំនួយអន្តរជាតិ ដែលស្នើឱ្យអ៊ីស្រាអែលអនុញ្ញាតឱ្យជំនួយឆ្ពោះទៅកាន់ភាគខាងជើង ដែលជាតំបន់ដែលប្រកាសថាបានជួបវិបត្តិទុរ្ភិក្សកាលពីខែសីហាកន្លងមក។
ស្ថាប័ន COGAT ដែលស្ថិតក្រោមក្រសួងការពារជាតិអ៊ីស្រាអែល និងទទួលខុសត្រូវលើកិច្ចការស៊ីវិលនៅទឹកដីប៉ាឡេស្ទីន បានបញ្ជាក់នៅលើបណ្តាញ X (អតីត Twitter) ថាថ្ងៃនេះ ច្រកឆ្លងកាត់ Zikim ត្រូវបានបើកសម្រាប់ការចូលរបស់រថយន្តដឹកជំនួយមនុស្សធម៌ចូលទៅក្នុងតំបន់ ហ្គាហ្សា។
COGAT បានបន្ថែមថា ជំនួយទាំងនេះ ត្រូវបានផ្គត់ផ្គង់ដោយអង្គការសហប្រជាជាតិ និងអង្គការអន្តរជាតិផ្សេងៗ ហើយនឹង ឆ្លងកាត់ការត្រួតពិនិត្យសន្តិសុខរបស់អ៊ីស្រាអែលជាធម្មតាមុន ពេលចែកចាយតាមរយៈប្រព័ន្ធអង្គការសហប្រជាជាតិ
ការបើកឡើងវិញនៃច្រកឆ្លងកាត់នេះបានធ្វើឡើងក្រោមបទឈប់បាញ់ដែលសម្របសម្រួលដោយសហរដ្ឋអាមេរិកដែលចូលជាធរមានតាំងពីថ្ងៃទី១០ ខែតុលា។តាមការវាយតម្លៃមានរថយន្តដឹកទំនិញជំនួយប្រហែល ៦០០ គ្រឿងក្នុងមួយថ្ងៃត្រូវបានគេសន្មត់ថាឆ្ពោះចូលទៅកាន់ហ្គាហ្សាប៉ុន្តែបរិមាណជាក់ស្តែងនៅតែមានតិចជាងនេះ៕