(ភ្នំពេញ)៖ យោងតាមសេចក្តីថ្លែងការណ៍របស់អ្នកនាំពាក្យព្រឹទ្ធសភានៃព្រះរាជាណាចក្រកម្ពុជា ថ្កោលទោសអំពើឈ្លានពាន គួរឱ្យស្អប់ខ្ពើមនិងការរំលោភបំពានលើអធិបតេយ្យភាពកម្ពុជាដោយប្រទេសថៃ ចុះថ្ងៃទី១២ ខែវិច្ឆិកា ឆ្នាំ២០២៥ បានឱ្យដឹងថា កម្ពុជាបញ្ជាក់ជាថ្មីនូវការប្តេជ្ញាចិត្តឥតងាករេរបស់ខ្លួនចំពោះសន្តិភាព កិច្ចសន្ទនា និងនីតិរដ្ឋ ។
ប៉ុន្តែសូមព្រមានថា ការប៉ុនប៉ងបំផ្លាញសន្តិភាព ឬបង្កគ្រោះថ្នាក់ណាមួយដល់ប្រជាពលរដ្ឋកម្ពុជាស្លូតត្រង់ នឹងត្រូវជួបប្រទះនូវការការពារអធិបតេយ្យភាពជាតិកម្ពុជាយ៉ាងម៉ឺងម៉ាត់និងខ្លាំងក្លាបំផុត។
សន្តិភាពត្រូវតែការពារ ការពិតត្រូវតែលើកតម្កើង ហើយយុត្តិធម៌ត្រូវតែឈ្នះ។
នៅក្នុងសេចក្តីថ្លែងការណ៍នោះដែរ ព្រឹទ្ធសភាកម្ពុជា បានសង្កត់ធ្ងន់ថា ចាប់តាំងបទឈប់បាញ់គ្នាចូលជាធរមាន នៅថ្ងៃទី២៨ ខែកក្កដា ឆ្នាំ២០២៥ កម្ពុជាបានអនុវត្តការអត់ធ្មត់ជាអតិបរមាដោយបានចៀសវាងមិនធ្វើការវាយ បក បើទោះជាមានការញុះញង់បង្កហេតុជាច្រើនលើកច្រើនសារយ៉ាងណាក៏ដោយ ដោយគោរពយ៉ាងពេញលេញនូវគោលការណ៍សន្តិភាពនិងភាពជាអ្នកជិតខាងល្អ។ ទោះជាយ៉ាងណា កម្ពុជានឹងមិនធ្វើសម្បទានចំពោះ អធិបតេយ្យភាពឬសេចក្តីថ្លៃថ្នូររបស់ខ្លួនជាដាច់ខាត។
ព្រឹទ្ធសភាកម្ពុជា ក៏បានសម្តែងនូវការគាំទ្រយ៉ាងពេញទំហឹងចំពោះសេចក្តីថ្លែងការណ៍របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នៅថ្ងៃទី១២ ខែវិច្ឆិកា ឆ្នាំ២០២៥ ដែលបានថ្កោលទោសយ៉ាងដាច់អហង្ការចំពោះទង្វើដ៏ព្រៃផ្សៃទាំងអស់នោះ និងបញ្ជាក់ជាថ្មីនូវការ ប្តេជ្ញាចិត្តដ៏មុតមាំរបស់កម្ពុជាចំពោះសន្តិភាព ស្ថិរភាពក្នុងតំបន់ និងការដោះស្រាយវិវាទដោយសន្តិវិធី តាមរយៈ កិច្ចសន្ទនានិងច្បាប់អន្តរជាតិ៕
