រដ្ឋាភិបាលអ៊ុយក្រែនកំពុងរងការប្រឈមដ៏ធ្ងន់ធ្ងរមួយ បន្ទាប់ពីការស៊ើបអង្កេតអំពើពុករលួយដ៏ធំមួយបានលេចធ្លោក្នុងវិស័យថាមពល និងបានបណ្តាលឱ្យមន្រ្តីជាន់ខ្ពស់ច្រើននាក់រួមទាំងរដ្ឋមន្ត្រីថាមពល និងរដ្ឋមន្ត្រីយុត្តិធម៌ ត្រូវលាលែងពីតំណែង។
ប្រភពពីសារព័ត៌មានBBC កាលពី១២ វិច្ឆិកា ២០២៥។
ប្រធានាធិបតី Volodymyr Zelensky បានអំពាវនាវឱ្យដករដ្ឋមន្ត្រីថាមពល Svitlana Grynchuk និងរដ្ឋមន្ត្រីយុត្តិធម៌ Herman Halushchenko ចេញពីតំណែង នៅថ្ងៃពុធ បន្ទាប់ពីការិយាល័យប្រឆាំងអំពើពុករលួយជាតិ (NABU) និងការិយាល័យព្រះរាជអាជ្ញាឯកទេសប្រឆាំងអំពើពុករលួយ (SAP) ចោទប្រកាន់មន្រ្តីជាច្រើនពីបទចូលរួមក្នុងផែនការកាប់កេងប្រាក់ជាង ១០០ លានដុល្លារ ពីគម្រោងក្នុងវិស័យថាមពលជាតិ។
យោងតាមព័ត៌មានផ្លូវការ អ្នកជាប់ពាក់ព័ន្ធត្រូវបានគេប្រមូលប្រាក់សំណូកចន្លោះពី ១០ ទៅ ១៥ ភាគរយ នៃតម្លៃកិច្ចសន្យាថាមពលជាមួយក្រុមហ៊ុននុយក្លេអ៊ែរ Enerhoatom។ ស្ថាប័នស៊ើបអង្កេតបានបញ្ជាក់ថា ប្រាក់ចំណូលខុសច្បាប់ទាំងនោះត្រូវបានលាងលុយកខ្វក់តាមអង្គភាពមួយនៅទីក្រុងគៀវ ហើយបញ្ជូនទៅក្រៅប្រទេស រួមទាំងទៅប្រទេសរុស្ស៊ីផងដែរ។
ក្នុងចំណោមអ្នកដែលត្រូវបានចោទប្រកាន់មាន អតីតឧបនាយករដ្ឋមន្ត្រី Oleksiy Chernyshov និង Timur Mindich អ្នកជំនួញ និងជាសហម្ចាស់ស្ទូឌីយោទូរទស្សន៍ Kvartal95 ដែលជាសហការីចាស់របស់លោក Zelensky។ ប្រភពអនុវត្តច្បាប់បាននិយាយថា លោក Mindich ត្រូវបានគេរាយការណ៍ថាបានភៀសខ្លួនចេញពីប្រទេស។
រដ្ឋមន្ត្រី Halushchenko បានប្រកាសថា លោកនឹងការពារខ្លួនប្រឆាំងនឹងការចោទប្រកាន់ ខណៈដែលអ្នកស្រី Grynchuk បាននិយាយថាក្នុងការងារវិជ្ជាជីវៈរបស់ខ្ញុំ មិនមានការរំលោភច្បាប់ឡើយ។
រឿងអាស្រូវនេះកើតឡើងនៅពេលដែលអ៊ុយក្រែនកំពុងប្រឈមមុខនឹងការវាយប្រហារពីរុស្ស៊ីលើរោងចក្រថាមពលជាច្រើន ហើយក៏បន្ថែមភាពតានតឹងក្នុងការបន្តទទួលការគាំទ្រពីសហភាពអឺរ៉ុប (EU) និងប្រទេសជាសម្ព័ន្ធ៕