អគ្គីភ័យមួយបានឆាបឆេះសំណង់បុរាណចម្លងមួយនៅវត្តយ៉ុងឈីង ក្នុងទីក្រុងហ្សាងជាហ្គាង ខេត្តជាំងស៊ូ ភាគខាងកើតប្រទេសចិន កាលពីថ្ងៃអង្គារទី១១ខែវិច្ចិកា ដែលបណ្តាលឱ្យខូចខាតយ៉ាងធ្ងន់ធ្ងរ មុនពេលវាត្រូវបានពន្លត់។ យ៉ាងណាមិញ មិនមានរបាយការណ៍អំពីអ្នករងរបួសនោះទេ។
រចនាសម្ព័ន្ធដែលរងផលប៉ះពាល់ ដែលគេស្គាល់ថាជា Wenchang Pavilion គឺជាការសាងសង់ឡើងវិញសម័យទំនើប នេះបើយោងតាមការចុះផ្សាយរបស់ Southern Metropolis Daily កាលពីម្សិលមិញ។ វីដេអូកន្លែងកើតហេតុបានបង្ហាញថា ដំបូលប្រក់ស្បូវ និងបន្ទះសិលាចារឹកត្រូវបានបំផ្លាញច្រើន។
វត្តនេះត្រូវបានបិទជាបណ្ដោះអាសន្ន ខណៈដែលអគ្គីភ័យកំពុងស្ថិតក្រោមការស៊ើបអង្កេត។
វត្តយ៉ុងឈីង ស្ថិតនៅជើងភ្នំហ្វេងហួងខាងលិច មានប្រវត្តិជាង ១៥០០ ឆ្នាំ។ ដំបូងឡើយត្រូវបានសាងសង់ក្នុងរាជវង្សអ៊ូខាងកើត វាត្រូវបានពង្រីកនៅឆ្នាំ ៥៣៦ នៃគ.ស ដែលជាវត្តដ៏ល្បីល្បាញ និងជាទីតាំងសាសនាដ៏សំខាន់មួយនៅក្នុងតំបន់ជាំងណាន (ភាគខាងត្បូងនៃតំបន់ខាងក្រោមនៃទន្លេយ៉ាងសេ)។
យោងតាមគណនីប្រព័ន្ធផ្សព្វផ្សាយសង្គមផ្លូវការរបស់វត្ត រចនាសម្ព័ន្ធដើម ត្រូវបានបំផ្លាញនៅចុងទសវត្សរ៍ឆ្នាំ 1950 ដោយបន្សល់ទុកតែប្រាសាទបាក់បែក។ ដោយក្រោយមកកិច្ចខិតខំប្រឹងប្រែងកសាងឡើងបានចាប់ផ្តើមនៅក្នុងទសវត្សរ៍ឆ្នាំ 1990៕