ប្រធានាធិបតីសហរដ្ឋអាមេរិក លោក Donald Trump បានទទួលការណែនាំសំខាន់មួយនៅសប្តាហ៍នេះ ពីក្រុមសន្តិសុខជាតិ ស្តីពីជម្រើសសម្រាប់ប្រតិបត្តិការយោធាដែលអាចអនុវត្តបាននៅក្នុងប្រទេសវេណេស៊ុយអេឡា តំបន់ដែលកំពុងមានវិបត្តិនយោបាយ និងសង្គមធ្ងន់ធ្ងរ។
ប្រភពពីសារព័ត៌មានCNN នៅថ្ងៃទី១៤ខែវិច្ឆិកា។
តាមប្រភពទាំងនេះ លោក Trump មិនទាន់ធ្វើការសម្រេចចិត្តចុងក្រោយឡើយ។ គាត់ត្រូវបានគេរាយការណ៍ថា កំពុងវាយតម្លៃអំពីហានិភ័យ ឱកាស និងផលប្រយោជន៍នានា ប្រសិនបើអាមេរិកចាប់ផ្តើមយុទ្ធនាការយោធាទ្រង់ទ្រាយធំ ដោយមានគោលបំណងបណ្តេញប្រធានាធិបតី Nicolas Maduro ចេញពីអំណាច។
នៅក្រោម បញ្ជាការ សហរដ្ឋអាមេរិក ភាគ ខាង ត្បូង (SOUTHCOM) ត្រូវបានគេបញ្ជាឲ្យរៀបចំគោលដៅសម្រាប់ប្រតិបត្តិការមួយដែលមានឈ្មោះថា “Southern Spear”។ តាមមន្ត្រីជាន់ខ្ពស់ម្នាក់ដែលស្គាល់ផែនការ វាជាប្រតិបត្តិការប្រឆាំងគ្រឿងញៀន និងបណ្តាញឧក្រិដ្ឋកម្មដែលអាមេរិកចាត់ទុកថាបង្កគ្រោះថ្នាក់ដល់សន្តិសុខក្នុងតំបន់។
ក្រុមសន្តិសុខដែលបានបង្ហាញផែនការនេះដល់លោក Trump រួមមាន រដ្ឋមន្ត្រីការពារជាតិ Pete Hegseth និងប្រធានអគ្គសេនាធិការរួម ឧត្តមសេនីយ៍ Dan Caine។
លើសពីនេះ លោក Hegseth ក៏បានបង្ហោះសារមួយលើបណ្តាញសង្គម ដោយចែងថា Operation Southern Spear មានគោលបំណង “ការពារមាតុភូមិ, បង្រ្កាបក្រុមឧក្រិដ្ឋកម្មគ្រឿងញៀន និងធានាសុវត្ថិភាពអឌ្ឍគោលខាងលិច។ ទោះជាយ៉ាងណា គាត់មិនបានផ្តល់ព័ត៌មានលម្អិតអំពីប្រតិបត្តិការនោះឡើយ។
ទោះបីជាមានព័ត៌មានបន្តបន្ទាប់ក៏ដោយ មន្ទីរបញ្ចកោណ និងសេតវិមានមិនទាន់ផ្តល់អត្ថាធិប្បាយបន្ថែមទេ៕