យ៉ាងហោចណាស់មានមនុស្សប្រាំពីរនាក់បានស្លាប់ និង ២៧ នាក់ទៀតរងរបួស បន្ទាប់ពីឃ្លាំងស្តុកគ្រឿងផ្ទុះដែលរឹបអូសបានផ្ទុះឡើងនៅក្នុងស្ថានីយ៍ប៉ូលីសមួយក្នុងទីក្រុង Srinagar ដែលជាទីក្រុងសំខាន់របស់តំបន់ Kashmir ដែលគ្រប់គ្រងដោយឥណ្ឌា។
ប្រភពពីសារព័ត៌មានAljazeera។
ឃ្លាំងស្តុកគ្រឿងផ្ទុះនេះបានផ្ទុះឡើងនៅយប់ថ្ងៃសុក្រនៅស្ថានីយ៍ប៉ូលីសមួយក្នុងតំបន់ Nowgam ភាគខាងត្បូងនៃទីក្រុង Srinagar។
ប្រភពព័ត៌មានមិនបញ្ចេញឈ្មោះបានប្រាប់ទូរទស្សន៍ឥណ្ឌា NDTV ថា អ្នកស្លាប់ភាគច្រើនគឺជាប៉ូលីស និងមន្ត្រីក្រុមកោសល្យវិច្ច័យ ដែលកំពុងត្រួតពិនិត្យគ្រឿងផ្ទុះនៅពេលមានការបំផ្ទុះ។ មន្ត្រីពីរនាក់មកពីរដ្ឋបាល Srinagar ក៏បានស្លាប់នៅក្នុងការផ្ទុះនេះផងដែរ។
យោងតាមប្រព័ន្ធផ្សព្វផ្សាយ ដោយមានមនុស្សប្រាំនាក់នៅតែស្ថិតក្នុងស្ថានភាពធ្ងន់ធ្ងរ ចំនួនអ្នកស្លាប់អាចបន្តកើនឡើង។
យ៉ាងណាមិញ ប៉ូលីសបាននិយាយថា នេះមិនមែនជាការវាយប្រហារភេរវកម្មទេ វាជាឧប្បត្តិហេតុដ៏អកុសលមួយ។
ប៉ូលីសបាននិយាយថាការផ្ទុះនេះបានកើតឡើងនៅពេលដែលក្រុមកោសល្យវិច្ច័យ និងប៉ូលីសកំពុងត្រួតពិនិត្យសម្ភារៈផ្ទុះដែលរក្សាទុកនៅស្ថានីយ៍ប៉ូលីស៕