នៅសប្តាហ៍នេះ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានអំពាវនាវរកប្រព័ន្ធការពារដែនអាកាសបន្ថែមទៀតពីសម្ព័ន្ធមិត្ត បន្ទាប់ពីការវាយប្រហារតាមផ្លូវអាកាសរបស់រុស្ស៉ី បានផ្តាច់ជីវិតមនុស្ស៧នាក់នៅរដ្ឋធានីកៀវ។
ប្រភពពីសារព័ត៌មានReuters។
គួរជម្រាបថា ការអំពាវនាវចុងក្រោយនេះរបស់លោក Zelenskyy គឺក្រោយពេលមីស៉ីល និងដ្រូនរបស់រុស្ស៉ី បានវាយប្រហារយ៉ាងសន្ធប់ចំ អគារស្នាក់នៅមួយចំនួន ក្នុងទីក្រុងកៀវកាលពីថ្ងៃសុក្រ។
លោក ហ្សេលេនស្គី បាននិយាយយ៉ាងដូច្នេះថាអ៊ុយក្រែនត្រូវការការគាំទ្រប្រព័ន្ធការពារដែនអាកាសបន្ថែម ពីសំណាក់ដៃគូរបស់យើង។ បើតាមលោក ហ្សេលេនស្គី កាលពីថ្ងៃសៅរ៍ ក៏មានមនុស្ស៤នាក់ស្លាប់ផងដែរ ក្នុងការវាយប្រហាររបស់រុស្ស៉ី លើតំបន់ភាគខាងត្បូងអ៊ុយក្រែន។
គួរបញ្ជាក់ថា ចាប់តាំងពីសង្រ្គាមផ្ទុះឡើង កាលពីខែកុម្ភៈ ឆ្នាំ២០២២ ក្រៅពីទប់ទល់ការពារខ្លួន អ៊ុយក្រែនបានចាប់ផ្តើមប្រើប្រាស់ មីស៉ីលនិងដ្រូន វាយប្រហារតបតវិញតាមផ្លូវអាកាសលើរុស្ស៉ី។ សង្រ្គាមរវាងប្រទេសទាំងពីរ បានបន្តអូសបន្លាយអស់រយៈពេលជិត ៤ឆ្នាំហើយ ខណៈកិច្ចប្រឹងប្រែងការទូត ដើម្បីបិទបញ្ចប់ជម្លោះកំពុងជាប់គាំង៕