អាស៊ីអាគ្នេយ៍កំពុងរងផលប៉ះពាល់យ៉ាងធ្ងន់ធ្ងរពីជំនន់ទឹកភ្លៀងនិងការរអិលបាក់ដី បណ្តាលឱ្យមានអ្នកស្លាប់រាប់សិបនាក់នៅក្នុងប្រទេសជាច្រើន ខណៈដែលរដូវវស្សាប្រចាំឆ្នាំកាន់តែធ្ងន់ធ្ងរឡើងដោយសារការប្រែប្រួលអាកាសធាតុ។
ប្រភពពីសារព័ត៌មានAl Jazeera នៅថ្ងៃទី ១៧ ខែវិច្ឆិកា ឆ្នាំ ២០២៥។
នៅប្រទេសឥណ្ឌូនេស៊ី មនុស្សយ៉ាងហោចណាស់ ១៨ នាក់ស្លាប់ ក្នុងរយៈពេលមួយសប្តាហ៍។អាជ្ញាធរឥណ្ឌូនេស៊ីបានបញ្ជាក់ថា មានមនុស្សយ៉ាងហោចណាស់ ១៦ នាក់ស្លាប់ និង ៧ នាក់បាត់ខ្លួន បន្ទាប់ពីការរអិលបាក់ដីធំមួយនៅទីក្រុងស៊ីឡាកាប់ ខេត្តជ្វាកណ្តាល។ ការរអិលបាក់ដីនេះបានកប់ផ្ទះជាច្រើនខ្នងនៅភូមិ Cibeunying ជ្រៅរហូតដល់ ៣–៨ ម៉ែត្រ ធ្វើឱ្យកិច្ចស្វែងរក និងជួយសង្គ្រោះពិបាកយ៉ាងខ្លាំង។
ចំណែកឯនៅប្រទេសវៀតណាមវិញឡានក្រុងជួបគ្រោះថ្នាក់លើផ្លូវភ្នំ បណ្តាលឱ្យស្លាប់ ៦ នាក់។ការរអិលបាក់ដីដោយសារភ្លៀងធ្លាក់ខ្លាំងបានកប់ឡានក្រុងមួយដែលដឹកអ្នកដំណើរ ៣២ នាក់ នៅលើផ្លូវ Khanh Le ដែលភ្ជាប់ពី Da Lat ទៅ Nha Trang។ រដ្ឋាភិបាលបានរាយការណ៍ថាមានអ្នកស្លាប់៦នាក់ និងរងរបួស១៩នាក់។
តាមរបាយការណ៍រដ្ឋាភិបាល និងអង្គការអន្តរជាតិ វៀតណាម និងឥណ្ឌូនេស៊ីគឺជាប្រទេសចំណាត់ថ្នាក់ខ្ពស់ជាងគេក្នុងតំបន់ ដែលប្រជាជនជាងពាក់កណ្តាលរស់នៅក្នុងតំបន់ដែលមានហានិភ័យខ្ពស់ចំពោះទឹកជំនន់ និងការរអិលបាក់ដី។ អ្នកជំនាញព្រមានថា ការប្រែប្រួលអាកាសធាតុអាចនឹងធ្វើឱ្យរដូវវស្សាជាមួយឧបត្តិហេតុធម្មជាតិកាន់តែញឹកញាប់ និងមានភាពខ្លាំងជាងមុន៕