(ព្រៃវែង)៖ មានការភ្ញាក់ផ្អើលនិងបែកធ្លាយថា មន្ត្រីPMស្រុកពារាំង បានទារលុយពីអ្នកនេសាទខុសច្បាប់ចំនួន៨០ម៉ឺនរៀល ជាថ្នូរនឹងប្រគល់ម៉ូតូនិងឧបករណ៍(ឆក់ត្រី)ទៅឱ្យម្ចាស់ដើមវិញ!!។
ប៉ុន្តែការទារលុយនេះ មិនបានសម្រេចនោះទេ ដោយសារបុរសជាអ្នកឆក់ត្រី បានរត់គេចពីការបង្ក្រាប រហូតធ្លាក់ចូលទឹកជ្រៅនិងលង់ស្លាប់ តាំងពីពេលកើតហេតុមកម្ល៉េះ!។
*នេះបើយោងតាមការបញ្ជាក់ពីពលរដ្ឋ.!។
ហេតុការណ៍នេះបង្កការភ្ញាក់ផ្អើលត្រង់
ចំណុច(ទ្វារទឹករំលេច)ស្ថិតក្នុងភូមិព្រៃខ្លា ឃុំរាប ស្រុកពារាំង ខេត្តព្រៃវែង កាលពីព្រឹកទី២១.១១.២០២៥។
ខណៈពលរដ្ឋប្រទះឃើញសាកសពបុរសម្នាក់ដែលជាអ្នក”ឆក់ត្រី”បានអណ្ដែតទឹក..!។
សពឈ្មោះ ចេន ចិន ភេទប្រុសអាយុ២៦ឆ្នាំ នៅភូមិព្រៃខ្លា ឃុំរាប ស្រុកពារាំង ខេត្តព្រៃវែង(អ្នកឆក់ត្រី)។
*ជុំវិញរឿងនេះ ពលរដ្ឋបានអះអាងប្រាប់”ដើមរាំង”ថា ដើមចមដំបូលកាលពីយប់ថ្ងៃទី១៩.១១.២០២៥ ឈ្មោះ ចេន ចិន បានជិៈម៉ូតូចេញពីផ្ទះទៅឆក់ត្រីនៅចំណុចកើតហេតុ។
ក្នុងនោះ ស្រាប់តែមន្ត្រីPM ចុះបង្ក្រាបនិងដេញចាប់ខ្លួនឈ្មោះ ចេន ចិន ដែលកំពុងឆក់ត្រី។
ដោយរត់គេចពីការចាប់ខ្លួនឈ្មោះ ចេន ចិន ក៏បានរត់ចោលម៉ូតូ និងចោលឧបករណ៍ឆក់ត្រី ឆ្ពោះសំដៅទៅកន្លែងទឹកជ្រៅក្នុងបំណងឱ្យរួចផុតពីសមត្ថកកិច្ច ទាំងដែលខ្លួនស្លៀកខោជើងវែង ពិបាក ក្នុងការហែលទឹក..!។
ពលរដ្ឋបន្តថា នៅពេលនោះឈ្មោះ ចេន ចិន បានរួចផុតពីកណ្ដាប់ដៃសមត្ថកិច្ចប្រាកដមែន។
ប៉ុន្តែជាអកុសល រូបគាត់បែរជាដោះខ្លួនមិនរួចពីទឹកជ្រៅ បណ្ដាលឱ្យលង់ស្លាប់គ្មាននរណាដឹង.!!?។
ស្របពេលដែលអាគុយ.ឧបករណ៍ឆក់ត្រីរួមនិងម៉ូតូរបស់គាត់ ត្រូវបានសមត្ថកិច្ចPM ប្រមូលយកទៅរក្សាទុក.!។
*ពលរដ្ឋបញ្ជាក់ថា ក្រោយយកម៉ូតូទៅហើយ សមត្ថកិច្ចPM បានទំនាក់ទំនងមកក្រុមគ្រួសាររងគ្រោះ ដើម្បីឱ្យមកដោះម៉ូតូយកទៅវិញ ជាថ្នូរនឹងលុយ៨០ម៉ឺនរៀល។
ទន្ទឹមនិងនោះ ពលរដ្ឋបានសួរថា ឱ្យទៅដោះម៉ូតូយ៉ាងម៉េច បើមនុស្សមិនដឹងនៅឯណាផង..?។
មន្ត្រីPM ក៏បានឆ្លើយប្រាប់គាត់វិញថា អ្នកឆក់ត្រីឈ្មោះ ចេន ចិន បានរត់រួចហើយ គឺចាប់បានតែម៉ូតូ និងឧបករណ៍ឆក់ត្រីប៉ុណ្ណោះ.!!។
បើតាមពលរដ្ឋ ករណីដេញចាប់អ្នកឆក់ត្រី យកលុយពីសំណាក់មន្ត្រីPMស្រុកពារាំង ពុំមែនជាលើកទី១នោះទេ..!។
ជាក់ស្តែង ពលរដ្ឋផ្សេងទៀតបានអះអាងថា កាលពីកន្លងទៅពួកខ្លួនគ្នា៤នាក់ បានទៅឆក់ត្រីនៅ(បឹងប្រាំង)ត្រង់ចំណុចខាងជើងកំពង់ឬស្សី។
ហើយក៏ត្រូវមន្ត្រីPMស្រុកពារាំង ចាប់ខ្លួនបាន និងបង់លុយអស់ម្នាក់ៗចំនួន៦០ម៉ឺនរៀល ទើបមន្ត្រីPM អនុញ្ញាតឱ្យមកផ្ទះវិញ.!!។
*ដើម្បីឱ្យមានចម្លើយទាំងសងខាង នៅរសៀលទី២១.១១.២០២៥”ដើមរាំង”បានសុំការបំភ្លឺពីលោក អន សូរវង្ស មេបញ្ជាការមូលដ្ឋានកងរាជអាវុធហត្ថស្រុកពារាំង
ដោយលោកថ្លែង ទទួលស្គាល់ថា មន្ត្រីរបស់លោក ពិតជាបានល្បាតនិងបង្ក្រាបបទល្មើសនេសាទ ត្រង់ចំណុចខាងលើប្រាកដមែន ដោយដកហូតឧបករណ៍និងវត្ថុតាងមករក្សាទុក ខណៈអ្នកប្រព្រឹត្តរត់គេចខ្លួន។
ពាក់ព័ន្ធរឿងលុយ៨០ម៉ឺនរៀល លោក អន សូរវង្ស អះអាងថាខ្ញុំមិនដឹងទេ.!។
*ចំពោះសំណួរថា តើកន្លងមកមន្ត្រីរបស់លោក បានចាប់អ្នកឆក់ត្រី៤នាក់ កំណត់យកលុយបានសម្រេច ក្នុងម្នាក់ៗ៦០ម៉ឺនរៀលដែរឬទេ…?។
ត្រង់ចំណុចនេះលោក អន សូរវង្ស បានឆ្លើយថា ខ្ញុំមិនដឹងឡើយ។
*រីឯលោក សូ អេង នាយប៉ុស្តិ៍នគរបាលរដ្ឋបាលឃុំរាប បានថ្លែងថា ឈ្មោះ ចេន ចិន ទំនងរត់គេចពីការបង្រាបរបស់សមត្ថកិច្ច ហែលទឹកមិនរួចបណ្ដាលឱ្យលង់ស្លាប់។
*ចំណែកលោក ចាន់ កិ មេឃុំរាប បានថ្លែងថា ជនរងគ្រោះពិតជាលង់ទឹកស្លាប់ប្រាកដមែន។
បើតាមលោកមេឃុំ គឺពលរដ្ឋបាននិយាយដូចៗគ្នាថា ឈ្មោះ ចេន ចិន បានរត់គេចពីការបង្ក្រាប រហូតលង់ទឹកស្លាប់ ព្រោះខោជើងវែង ដោះបានម្ខាងនៅម្ខាង ហែលទឹកមិនរួច!។
លោកមេឃុំ បន្តថា មើលតាមសភាពសាកសព គឺពេលស្លាប់និងពេលដេញបង្ក្រាបតែមួយ ហើយសាកសពទើបនិងអណ្ដែត នៅព្រឹកទី២១.១១.២០២៥នេះ។
*ទោះជាយ៉ាងណាក៏ដោយ ប្រជាពលរដ្ឋក្នុងមូលដ្ឋាន សុំស្នើយ៉ាងទទូចដល់លោកឧត្ដមសេនីយ៍ត្រី ឈួន គឹមសាន មេបញ្ជាការកងរាជអាវុធហត្ថខេត្តព្រៃវែង.ឯកឧត្ដម សួន សុម៉ាលីន អភិបាលខេត្តព្រៃវែង មេត្តាចាត់វិធានការវះកាត់ និងទប់ស្កាត់ ចំពោះសកម្មភាពដេញចាប់អ្នកឆក់ត្រីយកលុយ.!។
ដោយពលរដ្ឋគាំទ្រ ពេញទំហឹងចំពោះការបង្ក្រាបបទល្មើសនេសាទ ប៉ុន្តែកុំបង្ក្រាបហើយដោះលែងវិញ ជាថ្នូរនឹងផលប្រយោជន៍៕
