រថភ្លើងដឹកអ្នកដំណើរពីរគ្រឿងបានបុកគ្នាកាលពីថ្ងៃព្រហស្បតិ៍ទី20 ខែវិច្ឆិកា ឆ្នាំ2025 នៅក្នុងទីក្រុង Zliv តំបន់ភាគខាងត្បូងសាធារណរដ្ឋឆែក បណ្តាលឱ្យមានអ្នករងរបួសរាប់សិបនាក់។
ប្រភពពីសារព័ត៌មានReuters។
សេវាសង្គ្រោះបន្ទាន់បាននិយាយថា គ្រោះថ្នាក់កើតឡើងនៅចម្ងាយប្រហែល 132គីឡូម៉ែត្រខាងត្បូងរដ្ឋធានីប្រាហ្គី។ រូបភាពពីស្ថានការណ៍បង្ហាញពីការខូចខាតធ្ងន់ធ្ងរ នៅផ្នែកខាងមុខរថភ្លើងទាំងពីរ ដែលជាចំណុចបុកមុខទល់មុខ។
ទីភ្នាក់ងារសារព័ត៌មាន CTK បានរាយការណ៍ថា អ្នកពន្លត់អគ្គីភ័យត្រូវបានហៅឲ្យមកជួយដោះលែងអ្នកបើកបររថភ្លើងមួយគ្រឿងដែលត្រូវបានគាំងនៅក្នុងកាប៊ីន បន្ទាប់ពីការបុក។
អ្នកនាំពាក្យមន្ទីរពេទ្យក្នុងតំបន់បានប្រាប់ CTK ថា មនុស្សបួននាក់ត្រូវបានដឹកទៅមន្ទីរពេទ្យក្នុងស្ថានភាពរបួសធ្ងន់។ ខណៈដែលអភិបាលតំបន់ លោក Martin Kuba បានឲ្យដំណឹងថា មានអ្នករងរបួសមធ្យមប្រាំបួននាក់ និងអ្នករងរបួសស្រាលចំនួន 25 នាក់ទៀត។
រដ្ឋមន្ត្រីក្រសួងដឹកជញ្ជូន លោក Martin Kupka បានប្រកាសលើវេទិកា X ថា ករណីនេះកំពុងស្ថិតនៅក្រោមការស៊ើបអង្កេត៕