រដ្ឋាភិបាលអ៊ីស្រាអែលបានបញ្ជាក់ពីចេតនារបស់ខ្លួនក្នុងការរឹបអូសយកដីប្រវត្តិសាស្ត្រSebastia ដែលមានសារៈសំខាន់នៅសម័យរ៉ូម៉ាំង ក្នុងតំបន់ West Bank ដែលកំពុងត្រូវបានគេកាន់កាប់។ ការអភិវឌ្ឍថ្មីនេះកើតឡើងបន្ទាប់ពីក្រុមអ្នកតាំងទីលំនៅអ៊ីស្រាអែលបានបង្កើតប៉ុស្តិ៍ថ្មីមួយនៅតំបន់នោះក្នុងមួយយប់ ទាក់ទាញការរិះគន់យ៉ាងខ្លាំងពីសហគមន៍អន្តរជាតិ។
ប្រភពពីសារព័ត៌មានAl Jazeera នៅថ្ងៃទី២១ខែវិច្ឆិកា។
ក្រុម Peace Now ដែលតាមដានសកម្មភាពអ្នកតាំងទីលំនៅ បាននិយាយថា ផែនការរបស់អ៊ីស្រាអែលក្នុងការដណ្តើមយកដីឡូត៍ទំហំប្រមាណ ១៨០ ហិកតា (ប្រហែល ១៨០០ ដុនណាម) នឹងក្លាយជាការលួចយកដីដ៏ធំជាងគេក្នុងផ្នែកបុរាណវិទ្យារបស់តំបន់។ ទីតាំង Sebastia ត្រូវបានចាត់ទុកថា ជាផ្លូវសាសនា និងប្រវត្តិសាស្ត្រសំខាន់ ស្ថិតនៅជិតទីក្រុង Nablus ហើយជាទីតាំងដែលភ្ញៀវទេសចរជាច្រើនបានទៅទស្សនា។
ឯកសាររបស់រដ្ឋបាលស៊ីវិលអ៊ីស្រាអែល ដែលចេញនៅថ្ងៃទី ១២ ខែវិច្ឆិកា បានរាយបញ្ជីដីឡូត៍ដែលមានបំណងរឹបអូស។ កាសែត Haaretz រាយការណ៍ថា ផែនការនេះមានគោលបំណងអភិវឌ្ឍ Sebastia ជាទីតាំងបុរាណវិទ្យាដែលអាចទាក់ទាញភ្ញៀវទេសចរខ្លាំងជាងមុន។
អ្នកតាំងទីលំនៅអ៊ីស្រាអែលមួយចំនួនបានដុតផ្ទះ និងយានយន្តរបស់ជនប៉ាឡេស្ទីននៅគ្រប់តំបន់ West Bank ពេលថ្មីៗនេះ។ យោងតាមក្រុមសិទ្ធិមនុស្ស អំពើបណ្តេញជំរំ និងគម្រោងដកដីដទៃទៀតរបស់អ៊ីស្រាអែលអាចរាប់បញ្ចូលជាឧក្រិដ្ឋកម្មសង្គ្រាមក្រោមច្បាប់អន្តរជាតិ៕