រដ្ឋាភិបាលម៉ាឡេស៊ី បានប្រកាសថា នឹងអនុវត្តវិធានការហាមឃាត់កុមារអាយុក្រោម 16 ឆ្នាំពីការប្រើប្រាស់ប្រព័ន្ធផ្សព្វផ្សាយសង្គម ចាប់ពីឆ្នាំក្រោយ តាមរយៈច្បាប់ថ្មីមួយដែលមានបំណងការពារកុមារពីគ្រោះថ្នាក់តាមអ៊ីនធឺណិត និងបញ្ហាសុខភាពផ្លូវចិត្តកំពុងកើនឡើង។
ប្រភពពីសារព័ត៌មានAl Jazeera នៅថ្ងៃទី24 ខែវិច្ឆិកា ឆ្នាំ2025។
រដ្ឋមន្ត្រីទំនាក់ទំនង លោក Fahmi Fadzil បានប្រាប់សារព័ត៌មានថា រដ្ឋាភិបាលកំពុងពិនិត្យយកគំរូពីប្រទេសអូស្ត្រាលី និងប្រទេសផ្សេងៗទៀត ដែលកំពុងអនុវត្តច្បាប់តឹងរ៉ឹងក្នុងការផ្ទៀងផ្ទាត់អាយុអ្នកប្រើប្រាស់។ គាត់ថា វេទិកាប្រព័ន្ធផ្សព្វផ្សាយសង្គមគួរតែគោរពតាមសេចក្តីសម្រេចរបស់រដ្ឋាភិបាលក្នុងការហាមឃាត់អ្នកអាយុក្រោម 16 ឆ្នាំពីការបើកគណនី។
វិធានការនេះត្រូវបានអនុវត្តក្នុង context ដែលប្រទេសជាច្រើនកំពុងចាប់ផ្តើមដាក់ចេញច្បាប់ដើម្បីកំណត់ការចូលប្រើវេទិកាឌីជីថលរបស់កុមារ ខណៈក្រុមហ៊ុនបច្ចេកវិទ្យាធំៗដូចជា TikTok, Snapchat, Google និង Meta Platforms កំពុងប្រឈមមុខនឹងបណ្តឹងនៅសហរដ្ឋអាមេរិក ពាក់ព័ន្ធនឹងការប៉ះពាល់ប្រព័ន្ធផ្សព្វផ្សាយសង្គមលើសុខភាពផ្លូវចិត្តកុមារ។
ប្រទេសអូស្ត្រាលីកំពុងរៀបចំការបិទគណនីអ្នកប្រើប្រាស់អាយុក្រោម 16 ឆ្នាំ ចាប់ពីខែក្រោយ ខណៈប្រទេសបារាំង អេស្ប៉ាញ អ៊ីតាលី ដាណឺម៉ាក និងក្រិក ក៏កំពុងសាកល្បងប្រព័ន្ធផ្ទៀងផ្ទាត់អាយុផងដែរ។
រដ្ឋាភិបាលម៉ាឡេស៊ីបានពង្រឹងការត្រួតពិនិត្យលើវេទិកាឌីជីថលក្នុងរយៈពេលប៉ុន្មានឆ្នាំចុងក្រោយនេះ ដើម្បីទប់ស្កាត់មាតិកាដែលត្រូវបានចាត់ទុកថាបង្កគ្រោះថ្នាក់ រួមទាំងល្បែងស៊ីសងតាមអ៊ីនធឺណិត និងការលើកឡើងបញ្ហាពូជសាសន៍ សាសនា និងរាជវង្ស។ ចាប់ពីខែមករាមក វេទិកាឌីជីថលដែលមានអ្នកប្រើប្រាស់លើស 5 លាននាក់ ត្រូវបានទាមទារឲ្យមានអាជ្ញាប័ណ្ណក្នុងប្រទេស៕