កាលពីថ្ងៃទីចន្ទទី២៤ខែវិច្ឆិកា កងកម្លាំងអ៊ីស្រាអែល បានសម្លាប់ជនជាតិប៉ាឡេស្ទីនយ៉ាងហោចណាស់៤នាក់ និងធ្វើឱ្យរងរបួសជាច្រើននាក់ទៀតនៅទូទាំងតំបន់ហ្គាហ្សា ទោះបីជាមានបទឈប់បាញ់រយៈពេល ៦ សប្តាហ៍ ក៏ដោយ។
ប្រភពពីសារព័ត៌មានAl Jazeera។
ជនរងគ្រោះបុរសម្នាក់នៅ Bani Suheila ដែលត្រូវបានវាយប្រហារដោយដ្រូននៅតំបន់ដែលស្ថិតក្រៅខ្សែលឿង ដែលអ៊ីស្រាអែលកំណត់។ នៅភាគខាងជើងក៏មានកុមារម្នាក់ស្លាប់ពេលគ្រាប់រំសេវដែលបានបន្សល់ទុកដោយទាហានអ៊ីស្រាអែល បានផ្ទុះឡើងដោយកុមារជាច្រើនទៀតរងរបួសធ្ងន់ធ្ងរ។
អ្នករាយការណ៍ Al Jazeera លោក Tareq Abu Azzoum បានឲ្យដឹងថា ការវាយប្រហារត្រូវបានធ្វើឡើងជាបន្តបន្ទាប់ ដោយមានរបាយការណ៍អំពីការបាញ់កាំភ្លើងធំ ការវាយប្រហារតាមអាកាស និងការវាយប្រហារពីឧទ្ធម្ភាគចក្រនៅទាំងភាគខាងជើង និងខាងត្បូងនៃហ្គាហ្សា។ នៅ Beit Lahiya ការវាយប្រហារបានបំផ្លាញតំបន់ក្រៅខ្សែលឿង ខណៈរថក្រោះ និងឧទ្ធម្ភាគចក្រអ៊ីស្រាអែល បានវាយគោលដៅនៅ Rafah និង Khan Younis។
ករណីប្រល័យជាតិ និងការស្លាប់ជាបន្តបន្ទាប់ កើតឡើងក្នុងបរិបទដែលបទឈប់បាញ់ត្រូវបានចោទប្រកាន់ថារងការរំលោភជាញឹកញាប់។ ប្រជាជនប៉ាឡេស្ទីនបន្តប្រឈមមុខនឹងភាពមិនស្ថិតស្ថេរ កង្វល់សុវត្ថិភាព និងការបាត់បង់សមាជិកគ្រួសារជារៀងរាល់ថ្ងៃ ពេលការវាយប្រហារកាន់តែខ្លាំងឡើងនៅតំបន់ដែលរងការបំផ្លិចបំផ្លាញយ៉ាងធ្ងន់ធ្ងរ៕