ចំនួនអ្នកស្លាប់ដោយសារអគ្គីភ័យនៅហុងកុង បានកើនឡើងដល់១២៨នាក់ ខណៈអាជ្ញាធរបានទប់ស្កាត់អគ្គីភ័យដ៏សាហាវបំផុតដែលបានឆាបឆេះអគារលំនៅដ្ឋានមួយកន្លែងនៅតៃប៉ូ នេះបើយោងតាមប្រព័ន្ធផ្សព្វផ្សាយក្នុងស្រុក។មន្ត្រីបាននិយាយថា នៅមានសាកសព១៦នាក់នៅខាងក្នុងអគារដែលមិនទាន់អាចដោះស្រាយបាន។
ប្រភពពីសារព័ត៌មានBBC នៅថ្ងៃទី២៨ខែវិច្ឆិកា។
រហូតមកដល់ពេលនេះ មនុស្ស១២៨នាក់បានស្លាប់ ដែលក្នយងនោះម្នាក់ជាអ្នកពន្លត់អគ្គីភ័យ និង៧៩នាក់ផ្សេងទៀតបានរងរបួស ក្នុងនោះមានអ្នកពន្លត់អគ្គីភ័យ១១នាក់ នេះបើយោងតាមកាសែត South China Morning Post។
មុននេះ កាសែតប្រចាំថ្ងៃបានរាយការណ៍ថា មនុស្សជិត៣០០នាក់នៅតែបាត់ខ្លួនបន្ទាប់ពីហេតុការណ៍នេះ។
លោក John Lee នាយកប្រតិបត្តិទីក្រុងហុងកុង បាននិយាយពីមុនថា អគ្គីភ័យនៅក្នុងអគារទាំងប្រាំពីរត្រូវបានគ្រប់គ្រងរួចរាល់ហើយ។
អាជ្ញាធរហុងកុងបានសន្យាធ្វើ ស៊ើបអង្កេតពេញលេញ ព្រមទាំងជំរុញឱ្យមានការផ្លាស់ប្ដូរផ្នែកច្បាប់សុវត្ថិភាពសំណង់ ប្រសិនបើត្រូវការ។
ក្រុមសង្គ្រោះនៅតែបន្តដំណើរការនៅពេលយប់ ដើម្បីស្វែងរកអ្នករស់រានមានជីវិតនៅក្នុងកន្លែងកើតហេតុ ដែលក្លាយជាសំណង់ពណ៌ខ្មៅ៕