យ៉ាងហោចណាស់មនុស្ស៥៦នាក់បានស្លាប់ និង២១ នាក់ផ្សេងទៀតបានបាត់ខ្លួនក្នុងរយៈពេល ១០ ថ្ងៃនៃទឹកជំនន់ និងការបាក់ដីដ៏ធំនៅទូទាំងប្រទេសស្រីលង្កា នេះបើយោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុកនៅថ្ងៃសុក្រទី២៨ខែវិច្ឆិកា។
ប្រភពពីសារព័ត៌មានReuters។
ប្រតិបត្តិការជួយសង្គ្រោះនៅតែបន្តនៅក្នុងតំបន់ដែលរងផលប៉ះពាល់ខ្លាំង ខណៈដែលប្រទេសនេះនៅតែស្ថិតនៅក្រោមលក្ខខណ្ឌអាកាសធាតុធ្ងន់ធ្ងរ រួមទាំងភ្លៀងធ្លាក់ខ្លាំង ទឹកជំនន់កើនឡើង និងការបាក់ដីចាប់តាំងពីថ្ងៃទី ១៧ ខែវិច្ឆិកា ដែលបានរំខានដល់ជីវិតនៅទូទាំងស្រុកជាច្រើន នេះបើយោងតាមកាសែតក្នុងស្រុកភាសាអង់គ្លេស Daily Mirror។
យោងតាមមជ្ឈមណ្ឌលគ្រប់គ្រងគ្រោះមហន្តរាយ មនុស្ស ១៤ នាក់បានរងរបួស ខណៈដែលមនុស្សជាង ៤៣.៩៩១ នាក់មកពី ១៧ ស្រុកបានរងផលប៉ះពាល់យ៉ាងធ្ងន់ធ្ងរដោយសារអាកាសធាតុអាក្រក់នេះ។
យោងតាម Daily Mirror ប្រធានាធិបតីស្រីលង្កា Anura Kumara Dissanayake បានបញ្ជាឱ្យដាក់ពង្រាយបុគ្គលិកយោធាជាង ២០.០០០ នាក់ដើម្បីធ្វើប្រតិបត្តិការជួយសង្គ្រោះ។
អាជ្ញាធរបានចេញការព្រមានអំពីការរអិលបាក់ដីកម្រិតក្រហមសម្រាប់ស្រុកចំនួនប្រាំបីដែលមានហានិភ័យខ្ពស់ ដែលជាសញ្ញានៃហានិភ័យធ្ងន់ធ្ងរដល់ជម្រាលភ្នំ សហគមន៍ភ្នំ និងតំបន់ងាយរងគ្រោះ។
ប្រជាពលរដ្ឋនៅក្នុងស្រុកទាំងនោះត្រូវបានជំរុញឱ្យបន្តប្រុងប្រយ័ត្នខ្ពស់ ជៀសវាងការធ្វើដំណើរដែលមិនចាំបាច់ និងត្រៀមខ្លួនសម្រាប់ការជម្លៀសជាបន្ទាន់៕