ទីភ្នាក់ងារសារព័ត៌មាន Yonhap បានរាយការណ៍នៅថ្ងៃចន្ទទី១ខែធ្នូ ថាអគ្គស្នងការនគរបាលស្តីទីរបស់ប្រទេសកូរ៉េខាងត្បូង បានសុំទោសដល់ប្រជាជាតិចំពោះសកម្មភាពរបស់ប៉ូលីសក្នុងអំឡុងពេលច្បាប់អាជ្ញាសឹកដែលមានរយៈពេលខ្លីកាលពីឆ្នាំមុន។
ប្រភពពីសារព័ត៌មានReuters។
អគ្គស្នងការស្តីទី លោក យូ ជេស៊ុង បាននិយាយថាប៉ូលីសបានរឹតត្បិតការចូលរបស់អ្នកតំណាងរាស្ត្រនៅជុំវិញរដ្ឋសភានៅយប់ថ្ងៃទី 3 ខែធ្នូ ដោយបន្ថែមថាទង្វើនេះបានរំខានដល់លទ្ធិប្រជាធិបតេយ្យ និងសណ្តាប់ធ្នាប់រដ្ឋធម្មនុញ្ញ ហើយវាជាទង្វើមិនស្របតាមរដ្ឋធម្មនុញ្ញ និងខុសច្បាប់ដែលគំរាមកំហែងដល់ជីវិតប្រចាំថ្ងៃរបស់ប្រជាជន។
លោកបានបន្ថែមថាខ្ញុំសូមអភ័យទោសដោយស្មោះ។
គួររំលឹកថា ការសុំទោសនេះបានកើតឡើងមុនខួបមួយឆ្នាំនៃការប៉ុនប៉ងធ្វើច្បាប់អាជ្ញាសឹករបស់លោក យ៉ុន ស៊ុកយ៉ុល នៅថ្ងៃទី 3 ខែធ្នូ។
លោក ចូ ជីហូ អតីតប្រធានទីភ្នាក់ងារនគរបាលជាតិ និងលោក គីម បុងស៊ីក អតីតប្រធាននគរបាលទីក្រុងសេអ៊ូល បច្ចុប្បន្នកំពុងត្រូវបានកាត់ទោសពីបទបះបោរផងដែរ៕