ក្រុមហាម៉ាសប៉ាឡេស្ទីន បានប្រគល់សាកសពចំណាប់ខ្មាំងអ៊ីស្រាអែលម្នាក់ទៀតនៅភាគខាងជើងហ្គាហ្សាកាលពីថ្ងៃពុធទី៣ខែធ្នូ ក្រោមកិច្ចព្រមព្រៀងឈប់បាញ់។
ប្រភពពីសារព័ត៌មានAANews។
កងទ័ពអ៊ីស្រាអែលបានបញ្ជាក់ថា ក្រុមកាកបាទក្រហមបានទទួលមឈូសរបស់ចំណាប់ខ្មាំងម្នាក់ ហើយកំពុងធ្វើដំណើរដើម្បីផ្ទេរសាកសពទៅកងទ័ពរបស់ខ្លួននៅខាងក្នុងហ្គាហ្សា។
ការផ្ទេរនេះគឺជាផ្នែកមួយនៃកិច្ចព្រមព្រៀងឈប់បាញ់ និងការផ្លាស់ប្តូរអ្នកទោស ដែលចូលជាធរមាននៅហ្គាហ្សានៅថ្ងៃទី 10 ខែតុលា។
អ៊ីស្រាអែលទទូចថា សាកសពរបស់ចំណាប់ខ្មាំងពីរនាក់នៅតែស្ថិតនៅក្នុងហ្គាហ្សា ដោយអះអាងថា សាកសពមួយដែលផ្ទេរដោយហាម៉ាសមិនមែនជារបស់អ្នកទោសណាម្នាក់របស់ខ្លួនទេ។
បន្ទាប់ពីការប្រគល់ ភាគីប៉ាឡេស្ទីនបានអំពាវនាវឱ្យដាក់សម្ពាធលើអ៊ីស្រាអែលឱ្យបំពេញកាតព្វកិច្ចរបស់ខ្លួនក្រោមកិច្ចព្រមព្រៀងឈប់បាញ់។
ពួកគេបានអំពាវនាវដល់អ្នកសម្របសម្រួល និងអ្នកធានានៃកិច្ចព្រមព្រៀងឈប់បាញ់ ឲ្យដាក់សម្ពាធលើអាជ្ញាធរអ៊ីស្រាអែល ឲ្យបើកច្រកព្រំដែនរ៉ាហ្វាពីទិសទាំងពីរ ដូចដែលបានចែងក្នុងកិច្ចព្រមព្រៀង និងសេចក្តីសម្រេចលេខ ២៨០៣ របស់ក្រុមប្រឹក្សាសន្តិសុខអង្គការសហប្រជាជាតិ។
កាលពីថ្ងៃពុធ ស្ថាប័នយោធាអ៊ីស្រាអែល COGAT បានអះអាងថា ច្រកព្រំដែនរ៉ាហ្វានឹងត្រូវបានបើកសម្រាប់ការចេញចូលរបស់ប្រជាជនប៉ាឡេស្ទីនក្នុងរយៈពេលប៉ុន្មានថ្ងៃខាងមុខ ដោយសម្របសម្រួលជាមួយអេហ្ស៊ីប៕