យ៉ាងហោចណាស់មានជនស៊ីវិល៧៩នាក់ ត្រូវបានសម្លាប់ និង៣៨នាក់ផ្សេងទៀតរងរបួស នៅក្នុងការវាយប្រហារដោយដ្រូនរបស់កងកម្លាំងគាំទ្ររហ័ស (RSF) នៅភាគខាងត្បូង Kordofan នេះបើយោងតាមអាជ្ញាធរស៊ូដង់បញ្ជាក់កាលពីថ្ងៃសុក្រទី៥ខែធ្នូ។
ប្រភពពីសារព័ត៌មានAANews។
នៅក្នុងសេចក្តីថ្លែងការណ៍មួយ រដ្ឋាភិបាលរដ្ឋ South Kordofan បាននិយាយថា មានស្ត្រីបួននាក់ស្ថិតក្នុងចំណោមជនរងគ្រោះនៅក្នុងការវាយប្រហារដែលបានកំណត់គោលដៅទីក្រុង Kalogi នៅភាគខាងលិចប្រទេសស៊ូដង់កាលពីថ្ងៃព្រហស្បតិ៍។
រដ្ឋាភិបាលបាននិយាយថា ដ្រូនបានបាញ់មីស៊ីលចំនួនបួនគ្រាប់ចូលទៅក្នុងសាលាមត្តេយ្យ មន្ទីរពេទ្យ និងតំបន់ដែលមានប្រជាជនរស់នៅច្រើនកុះករនៅក្នុងទីក្រុង ដោយបានថ្កោលទោសការវាយប្រហារនេះថាជាឧក្រិដ្ឋកម្មដ៏សាហាវដោយចលនារំដោះប្រជាជនស៊ូដង់ខាងជើង (SPLM-N) ដែលជាសម្ព័ន្ធមិត្តរបស់ RSF។
ដំបូងឡើយ រដ្ឋាភិបាលរដ្ឋបាននិយាយថា មនុស្សប្រាំបីនាក់ រួមទាំងកុមារប្រាំមួយនាក់ និងគ្រូបង្រៀនម្នាក់ ត្រូវបានសម្លាប់ និងអ្នកផ្សេងទៀតបានរងរបួសនៅក្នុងការវាយប្រហារនេះ មុនពេលការស្លាប់បានកើនឡើងដល់ ៧៩នាក់។
រដ្ឋាភិបាលបានអំពាវនាវដល់សហគមន៍អន្តរជាតិ និងក្រុមសិទ្ធិមនុស្ស ឱ្យមានជំហររឹងមាំ ដើម្បីបញ្ចប់ការរំលោភបំពានទាំងនេះ កំណត់ RSF ជាអង្គការភេរវកម្ម។
សូមបញ្ជាក់ថាយោងតាមអង្គការសុខភាពពិភពលោក ជម្លោះរវាងកងទ័ពស៊ូដង់ និង RSF ដែលបានចាប់ផ្តើមនៅក្នុងខែមេសា ឆ្នាំ 2023 បានសម្លាប់មនុស្សយ៉ាងហោចណាស់ 40,000 នាក់ និងធ្វើឱ្យមនុស្ស 12 លាននាក់ត្រូវផ្លាស់ទីលំនៅ៕