(មណ្ឌលគិរី)៖ សង្វៀនបញ្ជល់មាន់និងអាប៉ោងខ្នាតធំលំដាប់VIP មួយកន្លែង ក្នុងចម្ការកៅស៊ូ ក្រោយភូមិឆ្នែង ស្ថិតនៅភូមិឆ្នែង ឃុំស្រែខ្ទុម ស្រុកកែវសីមា ខេត្តមណ្ឌលគិរី កំពុងបើកដំណើរការអាជីវកម្ម ដោយខុសច្បាប់ យ៉ាងអនាធិបតេយ្យបំផុត!។
-ខណៈសមត្ថកិច្ចមូលដ្ឋាន បានត្រឹមនិយាយថា ចាត់មន្ត្រីចុះពិនិត្យហើយ!!។
*ជាក់ស្ដែងៈ នៅវេលាថ្ងៃត្រង់ក្នុងថ្ងៃទី០៦.១២.២០២៥ គេឃើញក្រុមអ្នកញៀនល្បែង មកពីភូមិ-ឃុំ ដែលនៅក្បែរ និងមកពីតាមបណ្ដាស្រុកផ្សេងៗ។
បានធ្វើដំណើរប្រសេកប្រសាច តាមដងផ្លូវ ខ្លះជិៈម៉ូតូឌុបគ្នា ស្ពាយកន្ត្រកមាន់ជល់ ខ្លះទៀតជិៈរថយន្តសេរីទំនើបៗ ដឹកមនុស្ស រួមនិងកន្ត្រកមាន់ជល់មកជាមួយផង.!។
ដើម្បីមកប្រមូលផ្ដុំគ្នាលេងល្បែង យ៉ាងច្រើនណែនណាន់តាន់តាប់ នៅទីតាំង”សង្វៀនបញ្ជល់មាន់និងអាប៉ោង”ក្នុងចម្ការកៅស៊ូ ត្រង់ចំណុចខាងលើ យ៉ាងគគ្រឹកគគ្រេងបំផុត!។
សេចក្ដីរាយការណ៍បានឱ្យ«ដើមរាំង»ដឹងថាៈ”សង្វៀនបញ្ជល់មាន់និងអាប៉ោង”លំដាប់VIPខាងលើ.!បានបើកដំណើរការ ចាប់តាំងពីពាក់កណ្ដាល ខែវិច្ឆិកា ឆ្នាំ២០២៥ រហូតបច្ចុប្បន្ន ពោលគឺ បើកលេងរាល់ថ្ងៃតែម្ដង។
បើតាមអ្នកញៀនល្បែង បាននិយាយថាៈ”សង្វៀនបញ្ជល់មាន់និងអាប៉ោង”ខ្នាតធំត្រង់ចំណុចខាងលើ គឺលេងភ្នាល់ចាក់លុយធំៗណាស់.!។
ដោយមាន់ជល់១គូៗ ពួកគេភ្នាល់ចាក់លុយ ចាប់ពី៣លានរៀល ទៅ២០លានរៀលឯណោះ!។
ចំពោះអាប៉ោងវិញ ពួកគេភ្នាល់ចាក់លុយចាប់ពី ១លានរៀល ទៅ២០លានរៀលក្នុង១គ្របៗ!។
ដែលជាហេតុនាំឱ្យម្ចាស់ទីតាំង អាចប្រមូលលុយពីការ”ដកតុងហាន់សាវ”បានរាប់សិបលានរៀលក្នុងមួយថ្ងៃៗ សម្រាប់យកមករត់ការ ជាមួយអ្នកពាក់ព័ន្ធ បានយ៉ាងងាយស្រួល..!។
*ជុំវិញករណីនេះ នៅរសៀលទី០៦.១២.២០២៥”ដើមរាំង”បានព្យាយាមសុំការបំភ្លឺពីលោក សាន គឹមអ៊ាប អភិបាលស្រុកកែវសីមា
ប៉ុន្តែទូរស័ព្ទរបស់.ខលមិនចូល..!។
*រីឯលោក ហេង អ៊ួង អធិការនគរបាលស្រុកកែវសីមា
បានថ្លែងប្រាប់”ដើមរាំង”ថា ករណីខាងលើលោកបានចាត់កម្លាំងចុះត្រួតពិនិត្យ និងមានវិធានការហើយ។
បើតាមពលរដ្ឋ សកម្មភាពនៃការ លេងល្បែងខ្នាតធំ ត្រង់ចំណុចខាងលើ អាចប្រព្រឹត្តទៅបាន.ពុំមែនមកពីអាជ្ញាធរនិងសមត្ថកិច្ចមូលដ្ឋានមិនដឹងនោះទេ..!។
គឺមកពីមេការល្បែងសុំលេង និងត្រូវគ្នាជាប្រព័ន្ធ ព្រោះអ្នកលេងល្បែង មិនធំជាងសមត្ថកិច្ចនោះឡើយ បើមិនមានភ្លើងខៀវ គឺគ្មាននរណាហ៊ានបើកល្បែងជាដាច់ខាត!!។
ក្នុងរឿងនេះ ពលរដ្ឋសង្ឃឹមថា លោកឧត្តមសេនីយ៍ទោ ឡោ សុខា ស្នងការនគរបាលខេត្ដមណ្ឌលគិរី នឹងចាត់វិធានការក្ដៅមិនខាន! ដើម្បីកុំឱ្យមានការបើកល្បែងខ្នាតធំ បែបនេះតទៅទៀត។
ព្រោះថា អ្នកលេងល្បែងពេលឈ្នះមុខខ្លាញ់ ពេលចាញ់មុខខ្លា បើចាញ់ច្រើនកាលណា អ្វីៗក៏ហ៊ានធ្វើ អាចកើតជាអំពើហិង្សាក្នុងគ្រួសារ.អំពើចោរលួច.ចោរប្លន់.ឬអំពើអសន្តិសុខផ្សេងៗក្នុងមូលដ្ឋាន៕
