កាលពីថ្ងៃសៅរ៍ទី៦ខែធ្នូ ការវាយប្រហារដោយដ្រូនរបស់អ៊ីស្រាអែល បានសម្លាប់ស្ត្រីអាយុប្រហែល ៧០ និងកូនប្រុសរបស់នាង នៅទីក្រុងហ្គាហ្សា ក្រោមការប្រតិបត្តិការយោធានៅតំបន់ខ្សែពណ៌លឿង ដែលជាការកំណត់ព្រំដែនរវាងភាគីទាំងពីរនៅក្នុងកិច្ចព្រមព្រៀងឈប់បាញ់ខែតុលា។
ប្រភពពីសារព័ត៌មានAl Jazeera។
អ្នកឆ្លើយឆ្លងព័ត៌មាន Al Jazeera លោក ហានី ម៉ាមូដ បានរាយការណ៍ថា ស្ត្រី និងកូនប្រុសរបស់នាងត្រូវបាន quadcopter drone ដេញតាមជិតមួយគីឡូម៉ែត្រ មុនពេលត្រូវបានវាយប្រហារ ហើយត្រូវទុកឱ្យហូរឈាមរហូតដល់ស្លាប់ ខណៈ drone ហោះពីលើបានរារាំងមិនឱ្យនរណាទៅជួយបាន។ លោកហានីថានេះគឺជាការរំលោភបំពានមួយក្នុងចំណោមជាច្រើនកើតឡើងរៀងរាល់ថ្ងៃ ចាប់តាំងពីបទឈប់បាញ់ចូលជាធរមាន។
យោធាអ៊ីស្រាអែលអះអាងថា ការបាញ់ប្រហារទាំងនេះកើតឡើងក្រោយពេលមានមនុស្សឆ្លងខ្សែពណ៌លឿងប៉ុន្ដែប្រជាជនមូលដ្ឋានថ្លែងថា បន្ទាត់នេះគ្មានសញ្ញាសម្គាល់ ធ្វើឱ្យមនុស្សអាចឆ្លងចូលតំបន់គ្រោះថ្នាក់ដោយមិនដឹងខ្លួន។
នៅ Shujayea ភាគខាងកើតទីក្រុងហ្គាហ្សា កងកម្លាំងអ៊ីស្រាអែលបានបើកប្រតិបត្តិការធំមួយ ប្រើរថក្រោះ ដ្រូន និងកងទ័ពជើងគោក បំផ្លាញអគារលំនៅដ្ឋាន និងហេដ្ឋារចនាសម្ព័ន្ធសាធារណៈ បណ្ដាលឱ្យប្រជាជនរាប់រយនាក់រត់គេចខ្លួន៕