រដ្ឋាភិបាលជប៉ុន បានបង្ហាញការតវ៉ាយ៉ាងខ្លាំងចំពោះប្រទេសចិន បន្ទាប់ពីយន្តហោះJ-15 មួយគ្រឿងដែលហោះចេញពីនាវាផ្ទុកយន្តហោះ Liaoning បានចាក់សោរ៉ាដារលើយន្តហោះចម្បាំង F-15 របស់ជប៉ុន នៅលើអាកាសជិតកោះអូគីណាវ៉ា។
ប្រភពពីសារព័ត៌មានAP នៅថ្ងៃទី៧ខែធ្នូ។
ក្រសួងការពារជាតិជប៉ុនបានបញ្ជាក់ថា ការចាក់សោរ៉ាដារបានកើតឡើងពីរលើកកាលពីថ្ងៃសៅរ៍ មានរយៈពេលពីរ-បីនាទីរសៀល។ យន្តហោះ F-15 របស់ជប៉ុនច្រើនគ្រឿងបានប្រញាប់ឡើងអាកាស ដើម្បីតាមដានយន្តហោះចិន។
យោងតាមក្រសួង មិនមានការរំលោភលើដែនអាកាសជប៉ុន និងមិនមានអ្នករងរបួស ឬការខូចខាតណាមួយត្រូវបានរាយការណ៍ទេ។ ទោះជាយ៉ាងណា ការចាក់សោរ៉ាដាដែលជាការភ្ជាប់សញ្ញារកគោលដៅតាមប្រព័ន្ធអាវុធត្រូវបានចាត់ទុកថាជាទង្វើហានិភ័យខ្លាំង។
រដ្ឋមន្ត្រីការពារជាតិ លោក Shinjiro Koizumi បានថ្លែងថា ជប៉ុនបានតវ៉ាផ្លូវការទៅប៉េកាំង ដោយហៅឧប្បត្តិហេតុនេះថាជាសកម្មភាពគ្រោះថ្នាក់។ គាត់បានបន្ថែមថា ជប៉ុននឹងបន្តតាមដានស្ថានការណ៍យ៉ាងម៉ត់ចត់៕