(ភ្នំពេញ)៖ ឯកអគ្គរដ្ឋទូតរុស្ស៊ី ប្រចាំនៅកម្ពុជា លោក Anatoly Borovik ចេញមកទាត់ចោលការផ្សាយ របស់ថៃ ដែលថា មានពលរដ្ឋរុស្ស៊ី ធ្វើជាទាហានស៉ីឈ្នួលឲ្យកម្ពុជា ក្នុងការប្រយុទ្ធជាមួយថៃ!។
លោក Anatoly Borovik បានថ្លែងបែបនេះ ក្នុងសន្និសីទសារព័ត៌មានរបស់លោក ស្តីពីលទ្ធផលគោលនយោបាយការបរទេសរុស្ស៊ី នាថ្ងៃទី១៦ ខែធ្នូ ឆ្នាំ២០២៥។
លោកបញ្ជាក់ថា សេចក្តីប្រកាសរបស់ថៃ? មិនដែលមានព័ត៌មានបែបនេះទេ។ ដូច្នេះមិនមានភស្តុតាងអ្វីឡើយ។
បើថៃចោទដោយព័ត៌មានក្លែងក្លាយ យើងខាតពេលច្រើន ខ្ញុំមិនធ្វើអត្ថាធិប្បាយទេ។
ស្ថានទូតរុស្ស៊ី នៅក្នុងទីក្រុងបាងកក ប្រទេសថៃ ក៏បានថ្លែងសារថា សេចក្ដីរាយការណ៍ របស់ប្រព័ន្ធផ្សព្វផ្សាយថៃ មួយចំនួនដែលអះអាងថា មានពលរដ្ឋរុស្ស៊ី បានធ្វើជាទាហានស៊ីឈ្នួល នៅក្នុងជម្លោះព្រំដែន រវាងថៃ និងកម្ពុជា គឺជារឿងមិនពិតនោះទេ!។
ស្ថានទូតរុស្ស៊ី អះអាងថា ព័ត៌មានដែលពលរដ្ឋរុស្ស៊ី មួយចំនួនធ្វើជាទាហានស៊ីឈ្នួលក្នុងជម្លោះរវាងប្រទេសទាំង២ គឺជារឿងមិនពិត ហើយ ទំនងជាត្រូវបានប្រឌិតឡើងដោយពីប្រភពនៅខាងក្រៅតំបន់។
ស្ថានទូតបន្ថែមថា ការចោទប្រកាន់បែបនេះអាចធ្វើឱ្យប៉ះពាល់ដល់ សិទ្ធិរបស់ពលរដ្ឋរុស្ស៊ី នៅក្នុងប្រទេសថៃ ដែលស្នាក់នៅក្នុងប្រទេសមួយនេះ ជាភ្ញៀវទេសចរណ៍ ឬធ្វើជំនួញ ហើយក៏អាចបំផ្លាញដល់ទំនាក់ទំនងយូរអង្វែងរវាងរុស្ស៊ី និងថៃផងដែរ។
ស្ថានទូតរុស្ស៊ី រក្សាទំនាក់ទំនងមិត្តភាព និងកិច្ចសហប្រតិបត្តិការទាំងជាមួយកម្ពុជា និងថៃ ហើយគាំទ្រដល់ដំណោះស្រាយសន្តិវិធីដើម្បីបិទបញ្ចប់ជម្លោះព្រំដែន។
សូមជម្រាបថា យោធាថៃ បានបើកការឈ្លានពានមកលើកកម្ពុជា កាលពីថ្ងៃទី៧ ខែធ្នូ ឆ្នាំ២០២៥ រហូតបច្ចុប្បន្ន៕