រដ្ឋមន្ត្រីការបរទេសអ៊ីស្រាអែល លោក Gideon Saar បានអះអាងថា ប្រទេសអ៊ីស្រាអែលនៅតែមានចំណាប់អារម្មណ៍ក្នុងការស្វែងរកកិច្ចព្រមព្រៀងផ្អែកលើសន្តិសុខជាមួយប្រទេសស៊ីរី ទោះបីជាកងកម្លាំងអ៊ីស្រាអែលកំពុងបន្តកាន់កាប់ផ្នែកមួយនៃទឹកដីស៊ីរីក៏ដោយ ហើយបានបដិសេធថា អ៊ីស្រាអែលមិនមានមហិច្ឆតាពង្រីកទឹកដីនៅក្នុងស៊ីរី និងលីបង់ឡើយ។
ប្រភពពីសារព័ត៌មានAnadolu Agencyនៅថ្ងៃទី១៨ខែធ្នូ។
ក្នុងបទសម្ភាសន៍ជាមួយទូរទស្សន៍ Al Arabiya កាលពីថ្ងៃពុធ លោក Saar បាននិយាយថា កិច្ចព្រមព្រៀងណាមួយរវាងទីក្រុង Tel Aviv និងទីក្រុងដាម៉ាស អាចផ្តល់ផលប្រយោជន៍ដល់ភាគីទាំងពីរ។ លោកបានអះអាងថា អ៊ីស្រាអែលមិនដែលមានមហិច្ឆតាទឹកដីនៅក្នុងស៊ីរីទេ បើមិនដូច្នោះទេ យើងអាចយកទឹកដីបានច្រើនជាងនេះទៅហើយ។
ការអះអាងនេះកើតឡើងនៅបរិបទដែលអ៊ីស្រាអែលបានពង្រីកការកាន់កាប់របស់ខ្លួននៅភាគខាងត្បូងប្រទេសស៊ីរី បន្ទាប់ពីការដួលរលំនៃរបប Baath នៅថ្ងៃទី ៨ ខែធ្នូ ឆ្នាំ ២០២៤ និងបានបន្តអនុវត្តការវាយប្រហារតាមអាកាស ដោយកំណត់គោលដៅលើហេដ្ឋារចនាសម្ព័ន្ធយោធារបស់ស៊ីរី៕