ប្រធានាធិបតី វេណេស៊ុយអេឡា លោក Nicolás Maduro បានថ្កោលទោសយ៉ាងខ្លាំងចំពោះការអត្ថាធិប្បាយរបស់ប្រធានាធិបតីអាមេរិក លោក Donald Trump ដែលអះអាងថា ប្រេងនិងទ្រព្យសម្បត្តិផ្សេងៗរបស់អាមេរិក ត្រូវវេណេស៊ុយអេឡា លួចយក..!។
ប្រភពពីសារព័ត៌មានCNNនៅថ្ងៃទី១៨ខែធ្នូ។
ថ្លែងក្នុងសុន្ទរកថា នៅទីក្រុងការ៉ាកាស លោក Maduro បានព្រមានថា សហរដ្ឋអាមេរិក កំពុងព្យាយាមដាក់រដ្ឋាភិបាលអាយ៉ងមួយ ដើម្បីប្រគល់ដី ធនធាន និងរដ្ឋធម្មនុញ្ញរបស់វេណេស៊ុយអេឡា ឲ្យអំណាចក្រៅប្រទេស។
ការឆ្លើយតបនេះកើតឡើងបន្ទាប់ពីលោក Trump ប្រកាសថា សហរដ្ឋអាមេរិកចង់យកសិទ្ធិប្រេង និងដីត្រឡប់មកវិញ និងព្រមានអំពីការបិទផ្លូវនាវាដឹកប្រេងដែលពាក់ព័ន្ធនឹងវេណេស៊ុយអេឡា។
លោក Maduro ក៏បានលើកបញ្ហានេះទៅពិភាក្សាជាមួយអគ្គលេខាធិការអង្គការសហប្រជាជាតិ លោក António Guterres ដោយអំពាវនាវឲ្យ UN បដិសេធសម្តីដែលគំរាមកំហែងអធិបតេយ្យភាព និងច្បាប់អន្តរជាតិ។
អង្គការសហប្រជាជាតិ បានអំពាវនាវឲ្យភាគីទាំងពីរអនុវត្តការអត់ធ្មត់ និងដោះស្រាយភាពតានតឹងតាមមធ្យោបាយសន្តិភាព ខណៈស្ថានការណ៍រវាងសហរដ្ឋអាមេរិក និងវេណេស៊ុយអេឡាកំពុងកើនកម្ដៅខ្លាំងឡើង៕