អាជ្ញាធរអាល្លឺម៉ង់ បានចោទប្រកាន់មនុស្សចំនួន៨នាក់ពីបទពាក់ព័ន្ធនឹងក្រុមភេរវកម្មស្តាំនិយម ដែលមានគោលបំណងប្រើអំពើហិង្សាដើម្បីផ្តួលរំលំប្រព័ន្ធប្រជាធិបតេយ្យរបស់ប្រទេស។ នេះបើយោងតាមការបញ្ជាក់របស់ការិយាល័យព្រះរាជអាជ្ញាសហព័ន្ធអាល្លឺម៉ង់។
ប្រភពពីសារព័ត៌មានAnadolu Agency នៅថ្ងៃទី១៨ ខែធ្នូ ឆ្នាំ២០២៥។
ក្នុងចំណោមជនជាប់ចោទទាំងនេះ មាន ៧ នាក់ត្រូវបានចោទថាជាសមាជិកសកម្មនៃក្រុមភេរវករ និងមនុស្សម្នាក់ទៀតត្រូវបានចោទពីបទគាំទ្រក្រុម។ ជនសង្ស័យមួយចំនួនមានអាយុក្មេងខ្លាំង ដោយអាជ្ញាធរបញ្ជាក់ថា ពួកគេត្រូវបានចោទពីបទល្មើសធ្ងន់ធ្ងរច្រើន រួមមានដូចជាសមាជិកក្នុងអង្គការភេរវកម្ម ការប៉ុនប៉ងឃាតកម្ម ការឃុបឃិតប្រព្រឹត្តឃាតកម្ម និងការវាយប្រហារដោយហិង្សាធ្ងន់ធ្ងរ។
សូមបញ្ជាក់ថា៖ ក្រុមនេះបានហៅខ្លួនឯងថារលកចុងក្រោយនៃការការពារហើយត្រូវបានអាជ្ញាធរចាត់ទុកថាជាក្រុមជ្រុលនិយមស្តាំ ដែលមានគោលដៅចម្បងវាយប្រហារលើជនអន្តោប្រវេសន៍ និងគូប្រជែងនយោបាយ៕