អ្នកជាប់ឃុំប៉ាឡេស្ទីនពីតំបន់ហ្គាហ្សា ចំនួន ៦ នាក់ ត្រូវបានអ៊ីស្រាអែលដោះលែង និងបញ្ជូនទៅទទួលការព្យាបាលនៅមន្ទីរពេទ្យ Al-Aqsa Martyrs ក្នុងទីក្រុង Deir al-Balah កាលពីថ្ងៃអាទិត្យទី២១ខែធ្នូ ដោយមានការសម្របសម្រួលពីគណៈកម្មាធិការអន្តរជាតិនៃកាកបាទក្រហម (ICRC)។
ប្រភពពីសារព័ត៌មានAnadolu Agency។
ប្រភពវេជ្ជសាស្ត្របញ្ជាក់ថា អ្នកជាប់ឃុំទាំងនេះត្រូវបានវាយតម្លៃសុខភាព បន្ទាប់ពីឃុំខ្លួនអស់រយៈពេលជាច្រើនខែ ក្នុងពន្ធនាគារអ៊ីស្រាអែល ដោយគ្មានការបង្ហាញលម្អិតអំពីស្ថានភាពជាក់លាក់។ ក្រុមសិទ្ធិមនុស្សអះអាងថា ការឃុំខ្លួនបានកើតឡើងដោយគ្មាននីតិវិធីច្បាប់ច្បាស់លាស់ និងខ្វះស្តង់ដារមនុស្សធម៌។
សូមបញ្ជាក់ថា៖ យោងតាមអង្គការសិទ្ធិមនុស្ស អ្នកជាប់ឃុំជាច្រើនដែលត្រូវបានដោះលែងមានសុខភាពទន់ខ្សោយ ប្រឈមនឹងការអត់ឃ្លាន និងការរំលោភបំពាន ខណៈដែលប្រជាជនប៉ាឡេស្ទីនជាង 10,000 នាក់ នៅតែជាប់ឃុំនៅក្នុងពន្ធនាគារអ៊ីស្រាអែល។ ស្ថានការណ៍មនុស្សធម៌នៅហ្គាហ្សានៅតែធ្ងន់ធ្ងរ ទោះបីមានបទឈប់បាញ់ក៏ដោយ៕