កាលពីថ្ងៃអាទិត្យទី២២ខែធ្នូ ប្រធានាធិបតីសហរដ្ឋអាមេរិក លោក Donald Trump បានប្រកាសតែងតាំងលោក Jeff Landry អភិបាលរដ្ឋ Louisiana ជាបេសកជនពិសេសរបស់សហរដ្ឋអាមេរិកប្រចាំតំបន់ Greenland ដោយលើកឡើងថា លោក Landry មានការយល់ដឹងច្បាស់អំពីសារៈសំខាន់យុទ្ធសាស្ត្ររបស់ Greenland ចំពោះសន្តិសុខជាតិអាមេរិក។
ប្រភពពីសារព័ត៌មានAnadolu Agency។
ក្នុងសារបង្ហោះលើបណ្តាញ Truth Social លោក Trump បានបញ្ជាក់ថា Greenland មានតួនាទីសំខាន់ក្នុងការធានាសុវត្ថិភាព និងសន្តិសុខ មិនត្រឹមតែសម្រាប់សហរដ្ឋអាមេរិកប៉ុណ្ណោះទេ ប៉ុន្តែសម្រាប់សម្ព័ន្ធមិត្ត និងពិភពលោកទាំងមូលផងដែរ ហើយលោក Landry នឹងជំរុញផលប្រយោជន៍របស់អាមេរិកយ៉ាងសកម្មនៅតំបន់នេះ៕