ទំនាក់ទំនងរវាងស៊ីរី និងរុស្ស៊ីកំពុងឈានចូល ដំណាក់កាលថ្មីដោយផ្អែកលើការគោរពគ្នាទៅវិញទៅមក បន្ទាប់ពីរដ្ឋមន្ត្រីការបរទេស និងការពារជាតិស៊ីរី បានជួបពិភាក្សាជាមួយប្រធានាធិបតីរុស្ស៊ី លោក Vladimir Putin និងរដ្ឋមន្ត្រីការបរទេសរុស្ស៊ី លោក Sergey Lavrov នៅទីក្រុងមូស្គូ។ ភាគីទាំងពីរបានសង្កត់ធ្ងន់លើការពង្រឹងកិច្ចសហប្រតិបត្តិការនយោបាយ សេដ្ឋកិច្ច និងយោធា។
ប្រភពពីសារព័ត៌មានAl Jazeera នៅថ្ងៃទី២៤ខែធ្នូ។
រដ្ឋមន្ត្រីការបរទេសស៊ីរី លោក Asaad al-Shaibani បាននិយាយថា ស៊ីរីកំពុងចូលទៅក្នុងយុគសម័យថ្មី ក្រោយបញ្ចប់សង្គ្រាមរយៈពេល ១៤ ឆ្នាំ និងការលើកទណ្ឌកម្មអន្តរជាតិ ដោយផ្តោតលើការកសាងប្រទេសឡើងវិញ និងទាក់ទាញការវិនិយោគបរទេស។ ខណៈនេះ រុស្ស៊ីបានបញ្ជាក់ការគាំទ្រដល់បូរណភាពទឹកដីស៊ីរី និងការពង្រឹងទំនាក់ទំនងទ្វេភាគី។
ដំណើរទស្សនកិច្ចនេះជាផ្នែកមួយនៃការបន្តទំនាក់ទំនងរបស់អាជ្ញាធរថ្មីស៊ីរីជាមួយរុស្ស៊ី បន្ទាប់ពីការបញ្ចប់របបចាស់នៅដាម៉ាស ខណៈទីក្រុងមូស្គូគាំទ្រយ៉ាងរឹងមាំដល់ស្ថិរភាព និងសន្តិសុខរបស់ស៊ីរី៕