ប្រធានាធិបតីអាមេរិក លោក Donald Trump បានថ្លែងថា លោកនឹងពិចារណាតែបេក្ខជនសម្រាប់តំណែងប្រធានធនាគារកណ្ដាលអាមេរិក (Federal Reserve) ដែលយល់ស្របនឹងទស្សនៈរបស់លោកអំពីការបន្ថយអត្រាការប្រាក់ប៉ុណ្ណោះ។ លោកបានអះអាងថា អ្នកណាដែលមិនយល់ស្របជាមួយលោកនឹងមិនក្លាយជាប្រធានFed ឡើយ។
ប្រភពពីសារព័ត៌មានAnadolu Agencyនៅថ្ងៃទី២៤ខែធ្នូ។
ក្នុងសារបង្ហោះលើ Truth Social លោក Trump បានរិះគន់ Fed ចំពោះការដំឡើងអត្រាការប្រាក់នៅពេលទីផ្សារកំពុងដំណើរការល្អ ដោយនិយាយថា វាបំផ្លាញកំណើនទីផ្សារ និងសេដ្ឋកិច្ចដោយគ្មានហេតុផលចាំបាច់។ លោកបានបញ្ជាក់ថា លោកចង់ឱ្យប្រធាន Fed ថ្មីផ្តល់អាទិភាពដល់ការបន្ថយអត្រាការប្រាក់ ដើម្បីគាំទ្រកំណើនទីផ្សារ ហើយជឿថា ទីផ្សារដ៏រឹងមាំមិនមែនជាមូលហេតុនៃអតិផរណាទេ។
លោក Trump ក៏បានរិះគន់ប្រធាន Fed បច្ចុប្បន្ន លោក Jerome Powell ថា មានភាពស្ទាក់ស្ទើរក្នុងការកាត់បន្ថយអត្រាការប្រាក់។ ជាមួយនឹងអាណត្តិរបស់ Powell ដែលនឹងផុតកំណត់នៅខែឧសភា ឆ្នាំ២០២៦ លោក Trump បានបង្ហាញថា ការជ្រើសរើសអ្នកស្នងតំណែងថ្មី នឹងជាឱកាសសំខាន់សម្រាប់លោកក្នុងការកែទម្រង់ទិសដៅនយោបាយរបស់ Fed៕