អាជ្ញាធរតាជីគីស្ថាន បានប្រកាសថាមនុស្ស៥នាក់បានស្លាប់ ក្នុងការបាញ់ប្រហារគ្នានៅតាមព្រំដែនរវាងតាជីគីស្ថាន និងអាហ្វហ្គានីស្ថាន ដែលជាហេតុការណ៍លើកទីបីក្នុងរយៈពេលប៉ុន្មានសប្តាហ៍ថ្មីៗនេះ ដែលបណ្តាលឲ្យមានអ្នកស្លាប់ទាំងឆ្មាំព្រំដែន និងជនស៊ីវិល។
ប្រភពពីសារព័ត៌មានAl Jazeera នៅថ្ងៃទី២៦ខែធ្នូ។
យោងតាមទីភ្នាក់ងារការពារព្រំដែនតាជីគីស្ថាន ក្រុមជនប្រដាប់អាវុធធុនធ្ងន់មកពីអាហ្វហ្គានីស្ថាន បានឆ្លងព្រំដែនចូលមកក្នុងភូមិ Kavo ស្រុក Shamsiddin Shokhin ហើយបានវាយប្រហារប៉ុស្តិ៍យាមមួយ។ ក្នុងការប៉ះទង្គិចដោយអាវុធ ឆ្មាំព្រំដែនតាជីគីស្ថានពីរនាក់ត្រូវបានសម្លាប់ ខណៈអ្នកឈ្លានពានបីនាក់បានស្លាប់ក្នុងការប្រយុទ្ធគ្នា។
តាជីគីស្ថានបានចោទប្រកាន់រដ្ឋាភិបាលតាលីបង់អាហ្វហ្គានីស្ថានថា បរាជ័យក្នុងការធានាសន្តិសុខតាមព្រំដែន និងការប្រយុទ្ធប្រឆាំងអង្គការភេរវកម្ម ហើយបានអំពាវនាវឱ្យមានការសុំទោសពីថ្នាក់ដឹកនាំអាហ្វហ្គានីស្ថាន។ ភាគីអាហ្វហ្គានីស្ថាននៅមិនទាន់បានធ្វើអត្ថាធិប្បាយផ្លូវការនៅឡើយទេ៕