របាយការណ៍អំពីការទិញយក Instagram បង្ហើបឱ្យដឹងថា លោក Mark Zuckerberg បានរក្សាការសម្ងាត់។
ដោយមិនបានពិភាក្សា ឬសុំយោបល់ពីក្រុមប្រឹក្សាភិបាលរបស់ Facebook ឡើយ រហូតទាល់តែកិច្ចព្រមព្រៀងជិតនឹងបញ្ចប់ជាស្ថាពរ។
ការបង្ហាញនេះបានផ្តល់ពន្លឺដល់ទម្រង់នៃការធ្វើសេចក្តីសម្រេចចិត្តបែបមជ្ឈការដែលបានកំណត់ទិសដៅនៃការពង្រីកខ្លួនរបស់ Facebook ក្នុងសម័យកាលដំបូង។
ការចរចាដ៏រហ័សក្នុងរយៈពេលតែ៣ ថ្ងៃ។ នៅពេលនោះ Instagram គឺជាកម្មវិធីចែករំលែករូបភាពដែលកំពុងរីកចម្រើនយ៉ាងឆាប់រហ័ស ប៉ុន្តែមិនទាន់មានចំណូលនៅឡើយ។
លោក Zuckerberg បានមើលឃើញថាការទិញយកនេះគឺជាយុទ្ធសាស្ត្រចាំបាច់បំផុតមុនពេលគូប្រជែងផ្សេងទៀតដណ្ដើមបាន។ លោកបានចរចាដោយផ្ទាល់ជាមួយស្ថាបនិក Instagram លោក Kevin Systrom នៅផ្ទះផ្ទាល់ខ្លួនរបស់លោកក្នុងរយៈពេលតែ ៣ ថ្ងៃប៉ុណ្ណោះ។
ការរំលងក្រុមប្រឹក្សាភិបាល។ ការចរចា ឬផែនការទិញនេះមិនត្រូវបានបង្ហាញឱ្យដឹងដល់ក្រុមប្រឹក្សាភិបាលនោះទេ។ ក្រុមប្រឹក្សាភិបាលត្រូវបាន ប្រាប់ឱ្យដឹង ជាជាង ការពិគ្រោះយោបល់ ដែលនេះមានន័យថា លោក Zuckerberg បានរំលងក្រុមប្រឹក្សាភិបាល និងបានសម្រេចចិត្តដោយខ្លួនឯង។
លោកបានកាត់បន្ថយការចូលរួមពីក្រុមប្រឹក្សា ដើម្បីបញ្ចៀសការយឺតយ៉ាវដែលអាចធ្វើឱ្យបាត់បង់ឱកាស។
ការសម្រេចចិត្តនេះបានក្លាយជាចំណុចរបត់ដ៏សំខាន់សម្រាប់ក្រុមហ៊ុន ដូចជា តម្លៃមហាសាល ដោយ Instagram បានក្លាយជាទ្រព្យសកម្មដ៏មានតម្លៃបំផុតមួយរបស់ Facebook ដែលជំរុញទាំងចំនួនអ្នកប្រើប្រាស់ និងចំណូលផ្សាយពាណិជ្ជកម្ម។
បញ្ហាអភិបាលកិច្ច ទោះបីជាជោគជ័យ ប៉ុន្តែវាបានបង្កើតជាសំណួរអំពីតម្លាភាព និងទំនួលខុសត្រូវ។ ក្រុមប្រឹក្សាភិបាលមានតួនាទីត្រួតពិនិត្យ និងគ្រប់គ្រងហានិភ័យ ប៉ុន្តែការដែលមិនត្រូវបានផ្ដល់ព័ត៌មាន បានបង្ហាញពីភាពតានតឹងរវាង អំណាចស្ថាបនិក និង ការត្រួតពិនិត្យតាមបែបសាជីវកម្ម។
អ្នកគាំទ្រ បានយល់ឃើញថា រចនាសម្ព័ន្ធរបស់ Facebook ផ្តល់អំណាចឱ្យ Zuckerberg ធ្វើសកម្មភាពក្លាហាន និងរហ័សរហួនក្នុងទីផ្សារបច្ចេកវិទ្យាដែលវិវត្តន៍លឿន ប៉ុន្តែសម្រាប់អ្នករិះគន់វិញ បារម្ភថាការប្រមូលផ្ដុំអំណាចលើបុគ្គលតែម្នាក់ នឹងក្លាយជាបញ្ហានៅពេលដែលក្រុមហ៊ុនរីកធំខ្លាំង។
លោក Mark Zuckerberg បានទិញយក Instagram ក្នុងតម្លៃប្រមាណ ១ ប៊ីលានដុល្លារ កាលពីខែមេសា ឆ្នាំ ២០១២ ដោយការទិញយកនេះគឺជាព្រឹត្តិការណ៍ដ៏ភ្ញាក់ផ្អើលបំផុតមួយក្នុងពិភពបច្ចេកវិទ្យានៅពេលនោះ ដោយសារតែ Facebook បានបង់ជាសាច់ប្រាក់សុទ្ធចំនួន ៣០០ លានដុល្លារ និងនៅសល់ ៧០០ លានដុល្លារទៀតជាភាគហ៊ុនរបស់ក្រុមហ៊ុន Facebook ខណៈដែលនៅពេលនេះ Instagram មានបុគ្គលិកត្រឹមតែ ១៣ នាក់ ប៉ុណ្ណោះ។
ដោយសារតម្លៃភាគហ៊ុនរបស់ Facebook បានធ្លាក់ចុះបន្តិចនៅពេលកិច្ចព្រមព្រៀងត្រូវបានបញ្ចប់ជាស្ថាពរក្នុងខែកញ្ញា ឆ្នាំ ២០១២ តម្លៃសរុបពិតប្រាកដនៃការទិញដូរនេះគឺប្រហែល ៧១៥ លានដុល្លារ។
ទោះជាយ៉ាងណា តួលេខ ១ ប៊ីលានដុល្លារ គឺជាតួលេខដែលគេចងចាំ និងប្រើប្រាស់ជាផ្លូវការបំផុតក្នុងការចរចាដំបូង។
បច្ចុប្បន្ន Instagram ត្រូវបានគេប៉ាន់ប្រមាណថា មានតម្លៃលើសពី១០០ ប៊ីលានដុល្លារ ទៅហើយ ដែលធ្វើឱ្យការសម្រេចចិត្តរបស់ Mark Zuckerberg កាលពីពេលនោះ ក្លាយជាការវិនិយោគដ៏វៃឆ្លាតបំផុតមួយ៕