អ៊ីស្រាអែល បានប្រកាសរារាំងអង្គការជំនួយមនុស្សធម៌ជាង ៣០ ដែលកំពុងធ្វើការនៅតំបន់ហ្គាហ្សា ដោយអះអាងថា អង្គការទាំងនេះមិនបានបំពេញតាមច្បាប់ និងតម្រូវការថ្មីស្តីពីការចែករំលែកព័ត៌មានអំពីបុគ្គលិក មូលនិធិ និងប្រតិបត្តិការ។ អង្គការដែលរងផលប៉ះពាល់រួមមាន MSF (គ្រូពេទ្យគ្មានព្រំដែន), Oxfam, CARE International និងអង្គការជំនួយអន្តរជាតិធំៗផ្សេងទៀត។
ប្រភពពីសារព័ត៌មានAl Jazeera នៅថ្ងៃទី៣១ខែធ្នូ។
អ៊ីស្រាអែលបានចោទប្រកាន់ MSF ថាមានបុគ្គលិកខ្លះសហការជាមួយក្រុមហាម៉ាស ខណៈដែល MSF បានបដិសេធយ៉ាងតឹងរឹង និងព្រមានថា ការសម្រេចចិត្តនេះនឹងប៉ះពាល់យ៉ាងធ្ងន់ធ្ងរដល់សេវាសុខាភិបាលនៅហ្គាហ្សា ដែលអង្គការនេះគាំទ្រភាគច្រើនខាងគ្រែមន្ទីរពេទ្យ និងការសម្រាលកូន។
អង្គការមនុស្សធម៌ និងតំណាងប៉ាឡេស្ទីនបានរិះគន់ថា វិធានការនេះនឹងធ្វើឱ្យវិបត្តិមនុស្សធម៌នៅហ្គាហ្សាកាន់តែធ្ងន់ធ្ងរ ខណៈប្រទេសអឺរ៉ុបជាច្រើនបានបន្លឺសំឡេងព្រួយបារម្ភអំពីស្ថានភាពដ៏គួរឱ្យភ័យខ្លាច រួមទាំងការខ្វះខាតទីជម្រក សេវាសុខាភិបាល និងហេដ្ឋារចនាសម្ព័ន្ធអនាម័យ។ ទោះជាយ៉ាងណា អ៊ីស្រាអែលបានបដិសេធការរិះគន់ទាំងនេះ និងអះអាងថា វិធានការនេះគឺចាំបាច់សម្រាប់សន្តិសុខ និងការទប់ស្កាត់ការកេងប្រវ័ញ្ចជំនួយមនុស្សធម៌៕