ប្រធានសមាគមធុរកិច្ច កម្ពុជា- ឥណ្ឌា និងជាប្រធានក្រុមប្រឹក្សាភិបាលនៃវិទ្យាស្ថានបច្ចេកវិទ្យាគិរីរម្យ លោកKiran Kumar Reddy Churukanti បានអំពាវនាវដល់ប្រជាជនកម្ពុជា និងប្រជាជនឥណ្ឌាបង្កើតមូលនិធិឥណ្ឌា-កម្ពុជា ដើម្បីសាងសង់រូបសំណាកព្រះវិស្ណុថ្មីនៅលើទឹកដីកម្ពុជា ជានិមិត្តរូបនៃបេតិកភណ្ឌ បន្ទាប់កងទ័ពថៃបានវាយកម្ទេចទេវរូបព្រះវិស្ណុ នៅតំបន់អានសេះ។
តាមរយៈវិដេអូប្រមាណ ២នាទីដែលបង្ហោះនៅលើបណ្តាញសង្គមហេ្វសប៊ុក កាលពីថ្ងៃទី៣១ ខែធ្នូ ឆ្នាំ២០២៥ លោកថ្លែងអំណរគុណយ៉ាងជ្រាលជ្រៅ ចំពោះប្រជាជនកម្ពុជា ចំពោះការអភិរក្សបេតិកភណ្ឌដ៏មានតម្លៃរបស់អង្គរវត្ត ដែលជានិមិត្តរូបនៃអរិយធម៌ខ្មែរ ដែលពិភពលោកកោតសរសើរ។ នេះជាការលើកទឹកចិត្តដែលបានឃើញភ្ញៀវទេសចរឥណ្ឌាជាច្រើន មកដោយការគោរព និងការលះបង់ជាពិសេសទៅកាន់អង្គរវត្តក្នុងខេត្តសៀមរាប ដោយសារតែវត្តមានរបស់ព្រះវិស្ណុ ដែលជាផ្នែកមួយនៃប្រវត្តិសាស្ត្រកម្ពុជាអស់ជាច្រើនសតវត្សមកហើយ។
លោកលើកឡើងបន្តថា សព្វថ្ងៃនេះ កម្ពុជាកំពុងរីកចម្រើនទេសចរណ៍ កំពុងរីកចម្រើនចំណងវប្បធម៌ ខណៈប្រទេសទាំងពីរក៏មានជើងហោះហើរត្រង់ ដែលកំពុងនាំប្រទេសទាំងពីរឱ្យកាន់តែជិតស្និទ្ធ។
លើសពីនេះ លោកសូមឱ្យប្រទេសឥណ្ឌា និងប្រទេសកម្ពុជារីកចម្រើនកាន់តែរឹងមាំជាមួយគ្នា ក្នុងវិស័យវប្បធម៌ ពាណិជ្ជកម្ម អាជីវកម្ម និងកិច្ចសហប្រតិបត្តិការសេដ្ឋកិច្ច៕