មន្រ្តីអាមេរិក រួមនិងប្រព័ន្ធផ្សព្វផ្សាយ បានទទួលស្គាល់ថា អាមេរិក ពិតជាបានបើកប្រតិបត្តិការវាយប្រហារលើប្រទេសវ៉េណេស៊ុយអេឡាមែន។
ប្រភពពីសារព័ត៌មាន Reuters។
មន្រ្តីអាមេរិក និយាយក្នុងលក្ខខណ្ឌមិនបញ្ចេញឈ្មោះ ប្រាប់ទីភ្នាក់ងារព័ត៌មាន Reuters ថា អាមេរិក កំពុងបើកការវាយប្រហារនៅក្នុងទឹកដីវ៉េណេស៊ុយអេឡា ប៉ុន្តែមិនបានផ្តល់ព័ត៌មានលម្អិតជាងនេះទៀតទេ។
ចំណែកប្រព័ន្ធផ្សព្វផ្សាយ អាមេរិក ដូចជា CBS News និង Fox News ជាដើម ក៏បានរាយការណ៍ ដោយផ្អែកលើប្រភពពីមន្រ្តីក្នុងរដ្ឋបាលប្រធានាធិបតី ដូណាល់ ត្រាំ ទទួលស្គាល់ដែរថា កងកម្លាំងយោធាអាមេរិក គឺជាអ្នកនៅពីក្រោយការវាយប្រហារ ដែលបានកើតឡើងនៅរដ្ឋធានីការ៉ាកាស របស់វ៉េណេស៊ុយអេឡា។
នៅវេលាទាបភ្លឺថ្ងៃសៅរ៍ ទី៣ ខែមករា (ម៉ោងនៅវ៉េណេស៊ុយអេឡា) រដ្ឋាភិបាលវ៉េណេស៊ុយអេឡា បានចេញសេចក្តីថ្លែងការណ៍ថ្កោលទោស ការវាយប្រហារឈ្លានពានដោយយោធាពីសំណាក់សហរដ្ឋអាមេរិក ។
ដែលបានធ្វើឡើងប្រឆាំងទីតាំងជាច្រើននៅក្នុងទីក្រុងការ៉ាកាស ព្រមទាំងរដ្ឋមួយចំនួនទៀត ជាហេតុនាំឱ្យលោកប្រធានាធិបតី Maduro ប្រកាសដាក់ប្រទេសក្នុងគ្រាអាសន្ន៕