រដ្ឋមន្ត្រីការបរទេសចិន លោក វ៉ាង យី បានថ្លែងថា ចិនមិនអាចទទួលយកប្រទេសណាមួយដែលដើរតួជាចៅក្រមពិភពលោកបានទេ បន្ទាប់ពីសហរដ្ឋអាមេរិកបានចាប់ខ្លួនប្រធានាធិបតីវេណេស៊ុយអេឡា លោក នីកូឡាស ម៉ាឌូរ៉ូ។
ប្រភពពីសារព័ត៌មានReuters នៅថ្ងៃទី៥ខែមករាឆ្នាំ២០២៦។
លោកបានបញ្ជាក់ថា អធិបតេយ្យភាព និងឯករាជ្យភាពរបស់ប្រទេសទាំងអស់ ត្រូវតែទទួលបានការគោរព និងការពារ ដោយមិនគួរមានការកាត់ក្តីពីខាងក្រៅឡើយ។
ថ្លែងក្នុងវេទិកា Lanting នៅទីក្រុងប៉េកាំង លោក វ៉ាង យី បានអំពាវនាវឲ្យសហគមន៍អន្តរជាតិគោរពច្បាប់អន្តរជាតិ និងដោះស្រាយជម្លោះតាមរយៈការពិភាក្សាមិនមែនតាមរយៈអំណាច ឬវិធានការផ្នែកតុលាការដែលមានលក្ខណៈឯកភាគី។ ការថ្លែងនេះកើតឡើង ខណៈដែលសហរដ្ឋអាមេរិកបានអះអាងថា លោក ម៉ាឌូរ៉ូ នឹងត្រូវបង្ហាញខ្លួននៅតុលាការអាមេរិក ដែលបង្កឲ្យមានប្រតិកម្មយ៉ាងខ្លាំងពីប៉េកាំង និងបន្ថែមភាពតានតឹងផ្នែកការទូតនៅលើឆាកអន្តរជាតិ៕