ដាណឺម៉ាក ធ្វើការអំពាវនាវឱ្យសហរដ្ឋអាមេរិក បញ្ឈប់ការគំរាមកំហែងទាក់ទងនឹងកោះ Greenland ។
ខណៈដែលប្រធានាធិបតី លោក ដូណាល់ ត្រាំ បានប្រាប់ប្រព័ន្ធផ្សព្វផ្សាយថា លោកពិតជាត្រូវការទឹកដីនេះណាស់ បន្ទាប់ពីយោធាអាមេរិក ធ្វេីប្រតិបត្តិការនៅវ៉េណេស៊ុយអេឡា។
ប្រភពពីសារព័ត៌មាន AFP។
នាយករដ្ឋមន្ត្រីដាណឺម៉ាក លោកស្រី Mette Frederiksen បាននិយាយកាលពីថ្ងៃអាទិត្យថា ខ្ញុំត្រូវតែនិយាយរឿងនេះឱ្យច្បាស់ទៅកាន់សហរដ្ឋអាមេរិក ថាវាពិតជាមិនសមហេតុផលទេក្នុងការនិយាយថាសហរដ្ឋអាមេរិកគួរតែកាន់កាប់ Greenland។
លោកស្រីអំពាវនាវឱ្យទីក្រុងវ៉ាស៉ីនតោន សូមបញ្ឈប់ការគំរាមកំហែង ដល់ដាណឺម៉ាក ដែលជាសម្ព័ន្ធមិត្តប្រវត្តិសាស្ត្ររបស់ខ្លួនតទៅទៀត។
កាលពីចុងសប្ដាហ៍មុនលោក ត្រាំ បានប្រាប់ទស្សនាវដ្តី The Atlantic តាមទូរស័ព្ទអំពីភាពជាប់ពាក់ព័ន្ធគ្នានៃប្រតិបត្តិការយោធាអាមេរិកនៅវ៉េណេស៊ុយអេឡា សម្រាប់ Greenland ដោយនិយាយថា វាអាស្រ័យលេីអ្នកផ្សេងទៀតក្នុងការសម្រេចចិត្ត ប៉ុន្តែ យើងត្រូវការ Greenland ជាដាច់ខាត យើងត្រូវការវាសម្រាប់ការការពារខ្លួន។
លោក ត្រាំ និយាយថា ការធ្វើឱ្យទឹកដីដាណឺម៉ាក ក្លាយជាផ្នែកមួយនៃសហរដ្ឋអាមេរិក នឹងបម្រើផលប្រយោជន៍សន្តិសុខជាតិអាមេរិក៕