ប្រធានាធិបតីម៉ិកស៊ិក លោកស្រី Claudia Sheinbaum បានបញ្ជាក់ថា ប្រទេសម៉ិកស៊ិកមិនបានបង្កើនការដឹកជញ្ជូនប្រេងទៅកាន់ប្រទេសគុយបាទេ ទោះបីជាមានការផ្លាស់ប្តូរស្ថានភាពនយោបាយ និងថាមពលនៅប្រទេសវេណេស៊ុយអេឡាក៏ដោយ។ លោកស្រីបានលើកឡើងថា បរិមាណប្រេងដែលម៉ិកស៊ិកផ្ញើទៅគុយបា នៅតែស្របតាមកម្រិតប្រវត្តិសាស្ត្រដដែល។
ប្រភពពីសារព័ត៌មានReuters នៅថ្ងៃទី៨ខែមករាឆ្នាំ២០២៦។
លោកស្រី Sheinbaum អះអាងថា ម៉ិកស៊ិកបានផ្គត់ផ្គង់ប្រេងដល់គុយបាមករយៈពេលជាច្រើនឆ្នាំមកហើយ ទាំងតាមរយៈកិច្ចសន្យាពាណិជ្ជកម្ម និងជំនួយមនុស្សធម៌។ ប៉ុន្តែក្នុងបរិបទដែលសហរដ្ឋអាមេរិកបានកំណត់ការនាំចេញប្រេងពីវេណេស៊ុយអេឡា និងការចាប់ខ្លួនប្រធានាធិបតី Nicolas Maduro បានធ្វើឲ្យម៉ិកស៊ិកក្លាយជាអ្នកផ្គត់ផ្គង់ប្រេងសំខាន់មួយជំនួសវេណេស៊ុយអេឡា។
យ៉ាងណាក៏ដោយ លោកស្រីបានបដិសេធថា ម៉ិកស៊ិកនឹងបន្ថែមបរិមាណប្រេងឆៅទៅគុយបាជាពិសេស ដោយបញ្ជាក់ថា ការផ្គត់ផ្គង់បច្ចុប្បន្ន គឺជាផ្នែកនៃកិច្ចសន្យា និងជំនួយដែលមានជាប្រវត្តិសាស្ត្ររួចមកហើយ៕