រុស្ស៊ី បានបើកការវាយប្រហារលើអ៊ុយក្រែនដោយប្រើមីស៊ីលបាលីស្ទីកល្បឿនលឿនប្រភេទ Oreshnik កាលពីយប់ថ្ងៃព្រហស្បតិ៍ ដែលជាការប្រើប្រាស់អាវុធទំនើប និងកម្រមួយក្នុងសង្គ្រាម បង្កើនភាពតានតឹងខ្លាំងឡើងនៅអឺរ៉ុប ខណៈអ៊ុយក្រែនកំពុងប្រឈមនឹងអាកាសធាតុត្រជាក់ខ្លាំង។ នេះជាលើកដំបូងក្នុងរយៈពេលជាងមួយឆ្នាំដែលទីក្រុងមូស្គូប្រើប្រាស់មីស៊ីល Oreshnik ដែលអាចផ្ទុកក្បាលគ្រាប់ច្រើន និងអាចបំពាក់បន្ទុកធម្មតា ឬនុយក្លេអ៊ែរ។
ប្រភពពីសារព័ត៌មានCNN នៅថ្ងៃទី៩ខែមករាឆ្នាំ២០២៦។
ក្រសួងការពារជាតិរុស្ស៊ីបានអះអាងថា ការវាយប្រហារនេះជាប្រតិបត្តិការដ៏ធំដោយប្រើអាវុធចម្ងាយឆ្ងាយដែលមានភាពជាក់លាក់ខ្ពស់។ ទោះមិនបានបញ្ជាក់ទីតាំងវាយប្រហារដោយ Oreshnik ជាក់លាក់ក្តី អាជ្ញាធរអ៊ុយក្រែនបានរាយការណ៍ពីការផ្ទុះ និងការខូចខាតហេដ្ឋារចនាសម្ព័ន្ធសំខាន់ៗ នៅទីក្រុង Lviv និងទីក្រុងគៀវ៕