អ៊ីរ៉ង់ បានព្រមានដល់សហរដ្ឋអាមេរិក និងអ៊ីស្រាអែល ខណៈប្រធានសភាអ៊ីរ៉ង់ លោក Mohammad Bagher Qalibaf បានថ្លែងថា យោធារបស់ប្រទេសទាំងពីរ នឹងក្លាយជាគោលដៅស្របច្បាប់ ប្រសិនបើសហរដ្ឋអាមេរិកវាយប្រហារលើសាធារណរដ្ឋអ៊ីស្លាម ដូចការគំរាមកំហែងរបស់ប្រធានាធិបតី ដូណាល់ ត្រាំ។ ការថ្លែងនេះបានបង្ហាញពីការបន្ថែមអ៊ីស្រាអែលជាគោលដៅដែលអ៊ីរ៉ង់អាចវាយប្រហារ ក្នុងបរិបទភាពតានតឹងកាន់តែខ្លាំង។
ប្រភពពីសារព័ត៌មានAp នៅថ្ងៃទី១១ខែមករាឆ្នាំ២០២៦។
ការព្រមាននេះកើតឡើងនៅពេលដែលការតវ៉ាទូទាំងប្រទេសអ៊ីរ៉ង់ប្រឆាំងនឹងលទ្ធិទេវវិទ្យារបស់រដ្ឋាភិបាល បានឈានដល់ពីរសប្តាហ៍ ដោយមានបាតុករចេញតវ៉ានៅទីក្រុងធំៗ រួមទាំងទីក្រុងតេអេរ៉ង់ និងទីក្រុងសំខាន់ផ្សេងទៀត។ សកម្មជនសិទ្ធិមនុស្សរាយការណ៍ថា អំពើហិង្សាជុំវិញបាតុកម្មបានសម្លាប់មនុស្សយ៉ាងហោចណាស់ ១១៦ នាក់ និងមានមនុស្សប្រហែល ២,៦០០ នាក់ត្រូវបានឃុំខ្លួន។
អាជ្ញាធរអ៊ីរ៉ង់បានកាត់ផ្តាច់អ៊ីនធឺណិត និងទំនាក់ទំនងទូរស័ព្ទ ដែលធ្វើឲ្យការតាមដានស្ថានការណ៍ពីក្រៅប្រទេសកាន់តែពិបាក។ ទោះជាយ៉ាងណា ស្ថានការណ៍នយោបាយ និងសន្តិសុខនៅក្នុងប្រទេស នៅតែតានតឹងខ្លាំង ខណៈការតវ៉ា និងការគំរាមកំហែងអន្តរជាតិកំពុងបន្តកើនឡើង៕