យ៉ាងហោចណាស់ ជនជាតិប៉ាឡេស្ទីន៣នាក់ ត្រូវបានសម្លាប់ និង៧នាក់ រងរបួស ក្នុងការវាយប្រហាររបស់អ៊ីស្រាអែលពេញមួយយប់លើតំបន់ហ្គាហ្សា ដែលត្រូវបានចាត់ទុកថា ជា ការរំលោភលើបទឈប់បាញ់ដ៏ផុយស្រួយ ដែលបានព្រមព្រៀងគ្នាកាលពីខែតុលា រវាង អ៊ីស្រាអែល និងក្រុមហាម៉ាស។
ប្រភពពីសារព័ត៌មានAl Jazeera នៅថ្ងៃទី១១ខែមករាឆ្នាំ២០២៦។
ការវាយប្រហារបានកើតឡើងនៅតំបន់ជាច្រើន រួមមានទីក្រុង Rafah និង Khan Younis នៅភាគខាងត្បូងហ្គាហ្សា សង្កាត់ Zeitoun នៅភាគអាគ្នេយ៍ទីក្រុងហ្គាហ្សា និងតំបន់ផ្សេងទៀតទូទាំងតំបន់ដែលត្រូវបានឡោមព័ទ្ធ។ ក្នុងហេតុការណ៍មួយ ឧទ្ធម្ភាគចក្ររបស់អ៊ីស្រាអែលបានវាយប្រហារបុរសប៉ាឡេស្ទីនម្នាក់ ខណៈពេលកំពុងត្រូវបានបញ្ជូនទៅមន្ទីរពេទ្យនៅ Khan Younis។
ជាមួយគ្នានេះ ទីភ្នាក់ងារព័ត៌មានប៉ាឡេស្ទីន Wafa បានរាយការណ៍ថា បុរសប៉ាឡេស្ទីនពីរនាក់ទៀតត្រូវបានសម្លាប់ដោយការបាញ់ប្រហាររបស់យោធាអ៊ីស្រាអែល នៅភាគខាងកើតសង្កាត់ Zeitoun។ ការវាយប្រហារបន្តទាំងនេះបានបង្កើនការព្រួយបារម្ភអំពីស្ថានការណ៍សន្តិសុខ និងអនាគតនៃបទឈប់បាញ់នៅតំបន់ហ្គាហ្សា៕