ប្រធានាធិបតី សហរដ្ឋអាមេរិក លោក Donald Trump បានប្រកាសអនុវត្តបទបញ្ជាពាណិជ្ជកម្មថ្មីមួយ ដោយកំណត់ពន្ធនាំចូល 25% លើប្រទេសណាដែលបន្តធ្វើអាជីវកម្មជាមួយសាធារណរដ្ឋអ៊ីស្លាមអ៊ីរ៉ង់។
ការប្រកាសនេះត្រូវ បានចែករំលែកតាមបណ្តាញ Truth Social និងមានគោលបំណងបង្កើនសម្ពាធអន្តរជាតិលើរបបអ៊ីរ៉ង់។
ប្រភពពីសារព័ត៌មានFoxness នៅថ្ងៃទី១៣ ខែមករា ឆ្នាំ២០២៦។
បទបញ្ជានេះ កើតឡើងនៅពេលដែលអ៊ីរ៉ង់កំពុងប្រឈមមុខនឹងការតវ៉ាដ៏ធ្ងន់ធ្ងររយៈពេលជាងពីរសប្តាហ៍ ដែលបានបណ្តាលឱ្យមនុស្សយ៉ាងហោចណាស់ 544 នាក់ស្លាប់ តាមការរាយការណ៍របស់អង្គការសិទ្ធិមនុស្ស HRANA។
ការតវ៉ានេះត្រូវបានរាយការណ៍ថា បានជួបប្រទះនឹងការបង្ក្រាបយ៉ាងសាហាវពីរដ្ឋាភិបាល រួមទាំងការចាប់ខ្លួន ការបិទអ៊ីនធឺណិត និងការរឹតត្បិតសន្តិសុខនៅទូទាំងប្រទេស។
ពន្ធ 25% នេះអាចប៉ះពាល់ដល់ប្រទេសធំៗជាច្រើន ដូចជា ចិន ប្រេស៊ីល តួកគី និងរុស្ស៊ី ដែលមានទំនាក់ទំនងពាណិជ្ជកម្មជាមួយអ៊ីរ៉ង់។
ជាមួយគ្នានេះ ក្រសួងការបរទេសសហរដ្ឋអាមេរិកបានអំពាវនាវឱ្យពលរដ្ឋអាមេរិកពិចារណាចាកចេញពីអ៊ីរ៉ង់ ដោយសារតែស្ថានការណ៍ សន្តិសុខកាន់តែអាក្រក់៕