កងកម្លាំងសហរដ្ឋអាមេរិក បានរឹបអូសកប៉ាល់ដឹកប្រេងមួយទៀត ដែលមានទំនាក់ទំនងជាមួយប្រទេសវេណេស៊ុយអេឡា នៅសមុទ្រការ៉ាប៊ីន កាលពីព្រឹកថ្ងៃព្រហស្បតិ៍។
នេះជាកប៉ាល់ទីប្រាំមួយហើយ ដែលត្រូវបានរឹបអូស ក្នុងបរិបទដែលរដ្ឋបាលប្រធានាធិបតី ដូណាល់ ត្រាំ កំពុងពង្រឹងវិធានការគ្រប់គ្រងលើធនធានប្រេងរបស់ប្រទេសអាមេរិកឡាទីននេះ។
ប្រភពពីសារព័ត៌មានAl Jazeera នៅថ្ងៃទី១៦ខែមករា។
រដ្ឋមន្ត្រីក្រសួងសន្តិសុខមាតុភូមិ លោកស្រី Kristi Noem បានឲ្យដឹងថា ឆ្មាំសមុទ្រសហរដ្ឋអាមេរិកបានឡើងលើកប៉ាល់ដឹកប្រេង Veronica ដែលត្រូវបានចោទថាបានឆ្លងកាត់ដែនទឹកវេណេស៊ុយអេឡា និងរំលោភលើវិធានការដាក់ឲ្យនៅដាច់ដោយឡែកនាវា ដែលត្រូវបានអនុម័តដោយរដ្ឋបាលលោក Trump ក្នុងតំបន់ការ៉ាប៊ីន។
ប្រតិបត្តិការនេះ បានធ្វើឡើងដោយកងម៉ារីន និងនាវិកអាមេរិក ដែលឈរជើងលើនាវាផ្ទុកយន្តហោះ USS Gerald R. Ford រួមជាមួយក្រុមយុទ្ធសាស្ត្រឆ្មាំសមុទ្រ ហើយយោធាអាមេរិកបានបញ្ជាក់ថា ការរឹបអូសបានប្រព្រឹត្តទៅដោយគ្មានឧប្បត្តិហេតុ៕